E dirigente di sindicato Sindicato di Trahadonan di Aruba (STA) den un declaracion duna a papia superficialmente di loke a pasa cu ne na aeropuerto pa cual a dun’e su retiro di inmediato. E no tabata kier a bay den detayes, pero si a bisa cu tin hende a haci pio cu ne.
Pero prome cu esey el a elabora riba cosnan irregular cu a tuma luga na aeropuerto, cu nan a duna keho, pero cu nunca a haci algo al respecto. E ta corda con na December, 2021, STA a entrega keho na Internal Audit pa nombramentonan descabeya unda cu a tuma hende sin cu a cumpli cu contractonan colectivo. Loke STA a haci e tempo ey tabata exigi for di e departamento aki pa hala atras ya cu tabata visibel vriendjes politiek cu a tuma luga eynan. A viola tur regla den CAO.
Segun de Cuba e persona encarga e tempo ey tabata Carlos Rojer. “Desde e tempo ey mi a traha riba su tenchi. Ora e rapport a caba, Rojer a fayece den accidente di trafico.” Kico esaki tin di haber cu su situacion awo, a keda manera colga den aire.Pero si el a bisa cu riba 22 di juni ultimo e tabata trahando na post Zurich ora cu un hefe grandi a pidi’e permiso pa bay pafo y tuma un documento importante. “Mi a dun’e permiso pasobra mi tabatin bista completo riba dje, ya cu e mester a bay na e porta mes. Despues di tuma e envelop y ora cu el pasa door di e tunnel, e alarma a bay. Mi por sigura cu mi tabatin tur vigilancia riba dje y mi sa cu ta documento el a bay tuma y e ta hende serio.”
E di dos incidente cu a sosode pa cual a dicidi di schors’e ta pa algo similar. De Cuba a splica cu el a laga un empleado pasa cu un saco di cuminda fastfood. Dia 27 di juni el a manda su reaccion riba e puntonan pa cual a dun’e schorsing y dos dia despues mester a bay den oficina pa combersacion cu dos hefe. A duna un splicacion, pero pa su sorpresa el a bin haya un yamada dia 3 di juli pa bay oficina unda cu a entregue un carta di retiro. “Di biaha mi a bisa nan cu esey no ta husto.”
Loke e sindicalista no ta compronde ta cu den e carta di retiro ta menciona cu el a comete un violacion masha grandi mes, mientras cu e ta na altura di diferente caso hopi mas serio cu a tuma luga. El a duna ehempel di hendenan cu ta bende cuminda cu empleadonan y tur dia esakinan ta drenta sin cu esaki ta pasa den e mashin di xray. “Si bo kier kita Diego, mester kita henter aeropuerto.”
E ta sinti cu simplemente a keda busca algo pa condena su persona, si mira cu a bay atras y tin informacion cu ta data di luna di april. Pues a bay averigua su trabou di 400 ora pero loke ta menciona den e carta nunca a hala su atencion riba dje. Y esey e no ta compronde.
El a duna ehempel di un incidente cu a pasa dia 4 di mei ultimo, cu un manager di siguridad. Esaki a sosode net na e screening point cu ta algo sumamente delicado cu e no por duna informacion awo. Pero e empleadonan trahando ey “a sinti nan mes asina humiya cu nan a bin keha cerca mi. A pidimi pa entrega un keho y exigi investigacion di Internal Audit. Esaki ta algo cu ami como sindicalista no por nenga di haci.” E problema ta cu e dos personanan envolvi den e incidente ta e mesun e dos brothernan di e manager di siguridad.
El a simplemente coy e situacion ey y sconde bou su brasa. Ta ora cu STA a entrega e keho, e bala a cuminsa lora y e gerente a haya su mes den un situacion cayente. E caminda cu e manager a scoge pa sali di su problema, ta pa kita su persona (Diego de Cuba) for di caminda. E dolor ta cu STA a manda copia di e carta pa DCA pasobra e ta algo cu por a hinca Aruba den un problema masha grandi. Tristo ta cu no a haci nada contra e dos personanan aki. Personalmente e ta kere cu no a haci nada contra e dos personanan, pasobra nan ta riba lista pa un snoepreisje pa Hulanda paga door di Triple A. “Esaki ta mustra un persecucion contra Diego de Cuba, kende ta sali semper na defensa di trahadonan. Pa e motibo aki Diego de Cuba ta na cas pasobra a denuncia hechonan castigabel.”
Inclusive, e ta bisa cu e director di aeropuerto Joost MeiJs ta na altura di loke a pasa y a sconde e sucedido. Hefe di Recurso Humano, cu kende STA ta den un lucha pa miho pensioen pa trahadonan, ta gosa di e situacion. El a sigui menciona diferente punto cu nan ta lucha p’e na fabor di e trahadonan pa cual e ta kere ta motibonan cu kier colga e unico persona cu ta vocifera e dolor di trahadonan na Triple A y mal practicanan cu tin na pia di trabou.
Mirando e situacion, STA ta bay entrega un keho na International Labor Organization (ILO) pa tur e persecucionnan tumando luga contra lidernan sindical na aeropuerto. “E ta un unhusticia mi retiro y mi abogado ta atende cu esai. Den futuro cercano mi lo divulga kico a conduci na mi retiro,” e sindicalista a termina bisando.
