Ta tempo pa bira serio, stop di haci wega , stop di manipula, stop di bisa mi no tin pasenshi, mi mecha ta cortico, mi ta rabia lihe, pasobra solamente esnan cu tin pasenshi lo gosa di e bondadnan cu Dios ta ofrece den bida. Pasobra ta Dios mes ta produci pasenshi den nos.
Bo no por crece prome cu bo tempo, bo mester siña cana, prome cu bo corre, bo no por caba scol prome cu tempo, bo mester sinta den banki y siña pa bo por gradua, tur locual bo logra bao di man, of bo a kita oportunidad for di hende pa bo yega na dje, lo bo no tin goso den dje, pasobra e no ta pa bo.
Tur locual hende logra cu pasenshi semper lo wordo aprecia y balora, pasobra Fe ta produci pasenshi, pasenshi ta nifica cu nos tin contacto cu Dios, pasenshi ta un fruta di Spirito Santo, y bo no por tin fruta si bo no ta pega na e mata ( Juan 15:4+5).
Satanas ta horta pasenshi di hende, pa asina e por tin gara riba hende, y hinca hende den problema:
Pa falta di pasenshi tur dia accidente ta tuma lugar.
Pa falta di pasenshi violencia ta tuma lugar.
Pa falta di pasenshi hende ta drenta relacion robes.
Pa falta di pasenshi hende ta cay den inmoralidad.
Pa falta di pasenshi hende ta bira orguyoso.
Pa falta di pasenshi hende ta ofende hende.
Pa falta di pasenshi hende ta comete crimen.
Pa falta di pasenshi hende ta bira desconfia.
Pa falta di pasenshi hende ta comete fraude.
Pa falta di pasenshi hende ta kibra relacion.
Pa falta di pasenshi hende ta bira desespera, gaña, y cay den scuridad.
Pasenshi ta purifica nos Fe, pasobra cada prueba cu nos pasa den dje, ta pa crecemento spiritual, pa nos por siña conoce Dios mihor, laga nos djis corda riba e prueba di Abraham y e prueba di Job.
Pasenshi ta produci speransa, e ta hiba nos na perfeccion.Pasenshi ta siña nos pa tin amor pa hende mescos cu Dios tin amor pa nos.
Ningun mayor por dirigi su hogar sin pasenshi, pasobra bo no por lanta bo yuinan sin pasenshi.
Un hende cu henter dia ta bisa su yuinan cu e no tin pasenshi, e persona ey ta maltrata su yuinan, y ademas e ta lanta muchanan sin amor, di un nivel di comunicacion hopi abao, y cu facil ta manipula hende, y tambe nan mes por wordo manipula door di hende pasobra nan no tin pasenshi.
Cuanto embaraso hubenil ta tuma lugar, pasobra hobennan no tin pasenshi, y asina ta perde nan hubentud, scol y hopi mas.
Dios kier produci pasenshi den nos, pa siña nos confia den Dios, y asina cana den caminda di Dios.
Pasenshi ta siña nos persevera y asina logra e metanan den nos bida, pasobra tur dia nos mester lanta ariba cu pasenshi, hisa cara na laira y gradici Dios, y sigi pa dilanti.
Un hende cu ta rabia lihe, ta lanta pleito,ma esun cu no ta rabia lihe ta calma pleito,(Proverbionan 15:18).
E direccion den cual e mundo ta bayendo ta demostra na nos cu esnan cu no tin pasenshi, pa perservera y warda riba e binida di Señor lo tuma e marca di e bestia y asina lo perde tur cos.
Tene cuenta cu henter mundo lo pasa den e prueba. ( Mateo 24:13). ( 2 Tesalonisenses 2: 3+4).
Apostol Pablo a bisa cu e sa con pa biba den abundancia y con pa pasa den necesidad.( Filipensenan 4:11-13).
Laga nos confia den Señor.
Sinceramente , Pastor Marcel Balootje.
