Awe ta diamars, 13, un dia di miedo pa hopi supersticioso. Actividadnan rutinario manera crusa caminda, biaha, of realisa cualkier tramite, ta bira un reto midi na millimeter pa esnan cu ta sufri di e asina yama trezidavomartiofobia, fobia pa diamars 13. Pero,… cual ta realmente e dia di mala suerte, diamars 13 of diabierna13?
Pues e ta depende di e zona geografico unda bo ta ubica. Na paisnan manera Spaña, Grecia y paisnan di Latino America manera Argentina, Paraguay, Chile, … e supuesto mala suerte ta diamars 13. Mientras cu na paisnan manera Merca y Inglatera, nan ta pensa riba diabierna 13.
Origen di e mala suerte
E origen di e mito aki ta data na e leyendanan di antiguedad. Number 13 ta asocia na tur tipo di cosnan malo: e leyendanan nordico ta papia di 13 spirito di cosnan malo, Biblia te recoge den capitulo 13 di Apocalipsis e yegada di e Bestia di Anticristo, e number 13 di Cartanan di Suerte ta nifica morto.
Ademas, segun astrologia di Caldeonan, ta 12 cas y e signonan di universo, pa cual un number mas ta implica instabilidad y desekilibrio, creencia tambe di e Hindunan, cu ta papia di 12 experiencia vital di e ser humano.
E di diestres experiencia lo ta un gran cambio den e individuo. Tambe tabata diestres en total e personanan den e Ultimo Cena, 12 discipulo mas Hesucristo, despues di cual a mata Hesus. For di e momento ey a considera di mala suerte invita 13 persona na un comemento.
Diamars 13
E mal reputacion di diamars 13 ta data di mitologia Griego unda cu “Marte” ta e Dios di guera, cu ta nifica destruccion. Pa cual e union di diamars y e number 13 ta encera acumulacion di desgracianan grandi, cu ta haci cu e sociedad ta cataloga e dia aki como e dia di mala suerte.
Pa bisa un cos, e maestronan di Kabalah ta papia di e leyenda cu e confusion di idiomanan den e Toren di Babel a sosode riba un diamars 13, ocasionando e desgracia di mas grandi di historia di humanidad, haciendo imposibel e comunicacion, un necesidad di tur ser humano.
Diabierna 13
Mayoria di e historiadonan ta di acuerdo cu e superstitucion ta haya su origen na 1307. Diabierna, 13 di october di e aña di e Santo Inquisicion cu a persigui e Cabayeronan Templario, e Orden militar cristiano mas famoso di Edad Medio.
E Rey Frances Felipe IV “E Bunita”, a duna ordo pa caba cu esnan cu ta forma parti di e grupo aki, principalmente cu su lidernan. E mesun dia ey a tuma luga detencionnan simultaneo y asesinato na henter Europa.
Na Italia e dia di mala suerte ta diabierna 17
Na Italia e dia di mala suerte ta diabierna 17. Diabierna pasobra tabata e dia riba cual a crucifica Hesucrusto y 17 pasobra na Latin e number aki ta skirbi XVII cu ora haci un cambio den e orden (anagrama) ta VIXI, cu ta nifica mi a biba. E Italianonan ta considera cu e frase aki ta implica “awo mi ta morto”.
Asina pisa e supersticion di diabierna 17 ta na Italia cu algun modelo di avion di e compania Alitalia no tin e number aki. Na Toren Pirelli di Milan no ta existi piso 17 y e modelo di auto R17 di Renault na Italia ta conoci como R177.
Conseho pa sobrevivi un diamars y 13
Pa tur e supersticiosonan tin un serie di conseho cu mester tene cuenta pa pasa e dia sin problema:
No invita 13 persona na bo cas;
No corta huña of cabey awe
No hospeda na piso 13 di un hotel
No staciona bo auto riba un vak cu number 13
No sinta riba asiento 13 di un avion
Resumiendo, evita di tin contacto cu number 13, ya cu e fecha di e luna aki ta suficiente caba.
