Segun e plan nacional di vacunacion contra COVID-19, dialuna dia 22 di februari ta cuminsa vacuna esunnan di 60 aña bay ariba. Entrante diadomingo 21 di februari e invitacionnan lo cuminsa sali pa comunidad indicando e dia, orario y localidad na unda e persona mester acudi pa ricibi su vacuna.
Ta conseha e grupo di 60+ cu a registra via Aruba Health App pa ta pendiente di nan app y tambe di nan email den e proximo dianan. Por lo menos un biaha pa dia tira un bista den e Aruba Health App primi riba e ‘icon’ di vacuna y chek si bo cita por a drenta.
Na momento cu ricibi bo cita automaticamente ta haya cita pa bo di dos vacuna tambe. Esunnan cu no tin smart phone y a registra na edificio di MFA tambe mester ta pendiente di e celular pa un yamada. Vacunacion di e grupo di 60+ ta plania pa dura un promedio di 4 siman cuminsando dialuna dia 22 di februari. Tur invitacion lo no sali na mes momento p’esey e suplica ta bay na comunidad pa keda pendiente tur dia.
Un suplica ta bay na doñonan di trabou pa ta flexibel cu empleadonan cu kisas ta haya un cita pa vacuna durante orario di trabou. Por medio di e Aruba Health App e empleado por prueba cu e tin un cita pa vacuna y despues di ricibi e vacuna tur persona ta haya un comprobante. Pa bienestar di salud di cada empleado, bienestar general y recuperacion di Aruba ta necesario e colaboracion di empresanan pa cu cita di vacunacion di nan empleadonan.
Esun cu no a registra ainda por haci esaki via e Aruba Health App. Download’e for di playstore of por subi riba www.arubacovid19.org of tambe por pasa libremente na cualkier edificio di MFA di dialuna pa diabierna for di 7:30 am pa 4:30 pm non stop pa por registra.
