Entrante diadomingo awor, riba Dia di Tata, Avianca ta aumenta su vuelonan for di 11 vuelo pa siman pa 14 vuelo pa siman. Aña pasa Avianca a subi nan vuelonan for di 7 biaha pa siman pa 11 bes pa siman y desde diadomingo ta aumenta mas ainda na 14 vuelo. De facto, e aerolinea ta bula 2 bes pa dia for di Bogota pa Aruba. Den e cambio di iterinario, ta inclui vuelonan riba Diamars, Diaranson y Diahuebs. Avianca tin dos vuelo pa y for di Aruba pa dia, un mainta y otro atardi.
E aerolinea ta existi desde 93 aña pasa, pues for di aña 1925 y pa hopi aña consecutivo ta mantene un relacion estrecho y sin interupcion cu Aruba. Ta bula entre otro cu avionnan modelo Airbus 319 cu tin mas stoel disponibel pa nos destinacion. Avianca ta bula cu no menos di 177 avion pa 104 destinacion den 28 pais. Nan tin un total di 22.000 empleado y nan hubnan principal ta Bogota, San Salvador y Lima. Nan programa di biaheronan frecuente “LifeMiles” ta conta cu no menos di 6 miyon miembro rond mundo.
Avianca ta un opcion no solamente pa Bogota, pero tambe otro destinacionnan domestico den Colombia manera Cali, Medellin y Pereira. Tambe pa mercadonan existente pa Aruba manera Argentina, Brazil y Chile, pero tambe awor ta brinda oportunidad pa explora mercadonan nobo den Sur America manera Costa Rica, San Salvador y Uruguay.
