Ora diversidad biologico, of biodiversidad pa corto, tin un problema, humanidad tin un problema.
Bou di diversidad biologico frecuentemente ta compronde den termino di e variedad amplio di especie vegetal, animal y micro-organismo, pero tambe ta inclui e diferencianan den cada especie mes, por ehempel e variacionnan den cultivo y animal di cria, y e variedad di ecosistema (lago, bos, desierto, paisahenan agricola) cu ta alberga multiple tipo di interaccion entre nan especienan presente (humano, mata, animal, microorganismo).
Recursonan di diversidad biologico ta e pilarnan riba cual nos ta construi civilizacionan. Pisca ta provee 20 porciento di tur proteina animal pa mas o menos 3 biyon hende. Mas cu 80 porciento di e dieta di ser humano ta consisti di producto deriva di planta (cultivo). Casi 80 porciento di hende bibando den areanan rural den paisnan den desaroyo ta depende di medicina tradicional deriva di planta y hierba pa nan cuido medico basico.
Pero perdida di biodiversidad ta menasa nos tur, incluso nos salud. A ser comproba cu perdida di biodiversidad por causa un expansion di zoonoses, malesanan transmiti di animal pa ser humano, mientras cu di otro banda, si nos mantene biodiversidad intacto, esaki ta ofrece herment excelente pa lucha contra e pandemianan manera causa pa coronavirus.
Nacionnan Uni a proclama 22 di mei como Dia Internacional di Diversidad Biologico pa aumenta e comprension di y conscientisacion pa temanan di diversidad biologico.
TEMA PA 2024: BIRA PARTI DI E PLAN DI BIODIVERSIDAD
Na december 2022 a adopta e Framework Mundial di Biodiversidad di Kunming-Montreal tambe conoci como e Plan di Biodiversidad (“Biodiversity Plan”), un acuerdo historico cu ta fiha meta y medida concreto pa para y reverti e perdida di diversidad biologico pa 2050.
Pa e rason aki a scoge como tema pa 2024 pa Dia Internacional di Diversidad Biologico “Bira parti di e Plan di Biodiversidad” (Be part of the Plan).
E tema ta haci un yamada pa accion na gobiernonan, pueblonan indigena, comunidadnan local, NGOs, legisladonan, comercio, industria y ciudadanonan pa colabora activamente den e implementacion di e Plan di Biodiversidad, comparti nan contribucionnan y haci un compromiso cu e causa di e Plan. Tur hende tin un papel pa hunga den esaki y p’esey por ta #PartiDiEPlan” (#PartOfThePlan”).
MENSAHE DI ANTONIO GUTERRES, SECRETARIO GENERAL NACIONAN UNI
E red di diversidad biologico compleho ta sostene tur bida terrestre. No obstante e red aki ta desintegrando cu un paso alarmante, y ta humanidad tin e culpa.
Nos ta contaminando tera, oceannan y tur awa dushi cu substancianan toxico, ruinando paisahe y ecosistema y causando disrupcion y alteracion di nos precioso clima cu emision di gasnan cu efecto invernadero.
Decima y caba cu biodiversidad ta perhudicial pa desaroyo sostenibel den e presente y ta crea un futuro peligroso y insigur.
E Framework Mundial di Biodiversidad di Kunming-Montreal ta habri un caminda pa anula e perdidanan y restaura biodiversidad y, na mes momento, crea empleo, promove resiliencia y impulsa desaroyo sostenibel..
Gobiernonan mester hiba e iniciativa, pero, manera e lema di e aña aki di Dia Internacional di Diversidad Biologico ta bisa nos, nos tur ta forma “parti di e Plan” y nos tur tin un papel pa hunga.
Pueblonan indigena, empresanan, institucionnan financiero, autoridadnan local y regional, sociedad civil, hende muhe, hubentud y e mundo academico tin cu colabora cu otro para balora, proteha y restaura biodiversidad di un manera cu ta sali beneficioso pa un y tur.
Riba Dia Internacional di Diversidad Biologico, laga nos haci e compromiso pa forma parti di e Plan.
Y laga nos actua cu urgencia pa pone biodiversidad riba e caminda pa recuperacion. Y cu mira pa e 16ª reunion di e Conferencia di Partidonan den e Convenio di Diversidad Biologico, cu ta ser teni na october 2024, laga nos aumenta e ambicion pa proteha e Planeta y crea un futuro mas sostenibel pa un y tur.
SITUACION DI BIODIVERSIDAD NA ARUBA
Na 2009 Rainbow Warriors Core Foundation a acerca Nacionan Uni, specificamente e Secretariado di e Convenio pa Diversidad Biologico na Montreal pa por haci un prefeasability study pa e herment conoci como National Biodiversity Strategy and Action Plan (NBSAP). Comokiera cu NBSAP ta un instrumento di maneho nacional cu tipicamente ta ser formula dor di agencianan gubernamental cu participacion di tur partidonan interesa (stakeholders), a acerca Ministerio di Asuntonan Exterior di Hulanda cu den colaboracion di Conseho di Ministro na Aruba a acerca e Secretariado di dicho Convenio na Montreal.
Na final esaki a conduci na Rainbow Warriors Core Foundation haya luz berde na 2010 pa por haci e trabou aki como instancia pafor di Gobierno y e Secretario General na 2010, esta Ahmed Djoghlaf a asigna e Senior Programme Officer, na 2010, David Cooper como liaison.
Desafortudamente e estudio no por a ser haci debidamente comokiera cu e eliminacion di Antia Hulandes na 2010 a haci imposibel pa obtene dato di Antia Hulandes, indispensabel pa e contexto regional pa e estudio aki y na Aruba a confronta un actitud di no cooperacion di varios entidad gubernamental, entre otro di Parke Nacional Arikok.
Anno 2024, Directie Natuur en Milieu a anuncia cu a inicia cu e plan pa bin cu un National Biodiversity Strategy and Action Plan pa cual a contrata WynstraGudde como consehero pa crea e instrumento aki.
Nos ta sigur cu nos lo crea un NBSAP pa Aruba efectivo y nos por conta cu un sosten extra pa esaki di parti di Rainbow Warriors Core Foundation, ya cu e liaision asigna na 2010 pa nos organisacion ta e actual Secretario General Interino na Montreal, esta e mesun David Cooper.
