Algun siman atras, comienso di aña, minister di Husticia, Andin Bikker, a indica cu rond di 1 di Februari, lo e kier a tuma un decision pa wak si por yega na un palabracion cu e Alto Comisario actual, pa bay over na paralel por yega na un korpsleiding nobo.
Minister Bikker a para keto riba e ultimo incidentenan pa loke ta trata, den cual Cuerpo Policial a bin den un luz menos positivo. El a comenta cu el a hereda un cuerpo sumamente demotiva cu diferente caso disciplinario andando di cosnan menos bon cu a tuma luga. Algun siman pasa, corte mester a dicta un sentencia cu a ordena pa persigui un miembro di cuerpo policial, pasobra el ‘a haye den un accidente cu consecuencianan fatal. Tabata tin den e fin di siman aki, cierto incidentenan cu a pasa. Tin tambe diferente file cu a hereda di casonan disciplinario andando. Nan lo wordo atendi cun’e diligentemente, incluyendo esun di diabierna ultimo, cu tambe ta un caso lamentabel. Tabata tin contacto cu e alto comisario actual, kende lo atende cun’e diligentemente, pa pasonan disciplinario.
Bikker gusta busca e parti positivo, pasobra husto no por paga pa pegador. Tin cientos di persona cu ta forma parti di cuerpo policial cu ta haci un bon trabao tur dia, cual ta duna nan reconocimento y gradici nan. E minister ta sigur tambe cu esnan cu a haya nan den cosnan menos bunita, siguramente ta convenci cu nan ta arepenti grandemente pa esakinan.
Riba esaki, e mandatario a splica, pensando riba un manera positivo y constructivo, hecho ta cu e Alto comisario actual a indica cu, manera cu Bikker a asumi e responsabilidad, cu e kier un reto nobo. Lamentablemente e gobierno anterior no a percura pa e reto nobo aki wordo organisa. Nan a bay ministerraad, dia 5 di September ultimo, caminda cu nan a tuma un decision, pero no tin presupuesto pa e decision eynan. No tabata tin ningun instellingsbesluit cu a wordo formalisa, no a bay ningun dienst pa conseho etc. Esey a pone cu e tabata tin e deseo, respeta cu e alto comisario cu e kier un reto nobo y tin deseo pa bin cu un korpsleiding cu lo tuma e mando over, cu un comienso nobo.
Mester a cuminsa cu e proceso full di nobo, busca conseho, bay bek ministerraad. Dia 1 di Februari a pone como meta y e siman aki, decisionnan crucial lo tuma luga pa esaki. Ta spera e siman aki, cu por yega na un entendimento cu e alto comisario, caminda cu e reto nobo den un concepto un tiki mas structura, cu a haci e huiswerk full di nobo, cu lo yega na una cuerdo mutuo. E ora lo bay tin un vacatura y e pensamento ta e ora cu lo bin cu un korpsleiding temporal, caminda cu tareanan delinea, defini pa un tempo di mas of menos 1 aña, unda cu lo cuminsa cu e proceso pa yega na un procedura di solicitacion pa un alto comisario definitivo nobo. Den e tareanan aki, mirando tur e casonan cu a bin ta tumando luga, di prome cu Bikker a asumi su responsabilidad y tambe awor aki, ultimamente di cierto cosnan cu ta pone e cuerpo den un luz menos positivo, siguramente un di e tareanan crucial lo ta pa e korpsleiding nobo, pa bay dedica atencion na mehora e imagen di cuerpo policial. Na mes momento atendiendo e ora cu e casonan di falta di integridad y/of pa loke ta trata disciplina. Siguramente esaki ta algo diligentemente ta tumando luga. El a tuma un tiki mas tempo cu spera, pero a splica con e procedura a bay.
Manera cu e minister a menciona, dia 1 di Februari ta e meta. Pa mas tarda diabierna, cu tin ministerraad, por ta reuni y tuma decisionnan final riba e tematica aki.
