Aruba ta cla pa cuminsa vacuna e siguiente grupo di meta. E siguiente grupo di meta na turno ta personanan entre 18 cu 59 aña cu ta na risico pa motibo medico. Na e momento aki DVG ta bezig ta trahando hunto cu dokternan di cas pa por prepara locual ta necesario pa haci vacunacion di e grupo di meta aki posibel. Dokternan di cas lo haci seleccion di esnan cu ta rosorta bou di e grupo di meta aki, a base di un lista acorda di malesanan y condicionnan di salud.
Lo identifica ciudadanonan cu a registra via Aruba Health App of na edificio di MFA a base di un lista cu dokternan di cas lo provee y e personanan aki lo ricibi un invitacion pa por vacuna. E lista cu DVG lo ricibi di dokternan di cas ta encera number di AZV di e persona cu ta cualifica pa ricibi e vacuna dentro di e grupo di meta.
DVG lo no ricibi ningun tipo di informacion medico di ningun pashent cu otro palabra DVG lo no ricibi informacion ki enfermedad of condicion di salud e persona tin. No obstante cu dokter di cas ta manda e informacion di e pashent cu ta cay bou di e grupo di riesgo, ta urgi tur persona pa registra nan mes via e Aruba Health App of na un di e edificionan di MFA pa asina nan por ricibi nan afspraak pa vacuna.
Si un persona ta pensa cu e ta resorta bou di e grupo di meta defini como “na risico pa motibo medico”, pero ta contra of no ta desea pa su informacion wordo duna na DVG, e persona mester tuma contacto cu su dokter di cas.
E grupo di meta cu ta na risico pa motibo medico ta encera:
- Pashent cu tumor maligno diagnostica den ultimo 5 aña
- Pashent despues di transplante di organo, stamcel of beenmerg
- Pashent cu un grado primario di deficiencia inmunologico
- Personanan cu Down syndrome
- Pashent cu condicionnan neurologico pa cual motibo nan respiracion ta comprometi
- Persona cu obesidad morbil (body mass index (BMI >40)
- Pashent cu desfuncion di su via respiratorio/pulmonnan y pashentnan cu condicion cronico di su funcion di curason
- Pashent cu diabetes
- Pashent cu malesa cronico di riñon (pashent cu ta dialisa y cu a ricibi transplante)
- Pashent cu un afweerstoornis of cu ta wordo trata cu medicamento pa suprimi su sistema inmunologico pa cual motibo e pashent ta sufri di menos defensa contra infeccion di e via respiratorio
- Personanan cu deficiencia mental cu ta biba den institutonan of casnan di cuido
