Tur cos a cuminsa alrededor di 3:30 pm ora cu diferente mensahe a drenta na nos mesa di redaccion informando di un caso hopi serio den KIA. Mesora a purba di haya contacto cu canalnan oficial, entre otro cu director di KIA pa mira ki informacion concreto por ricibi. Berdad, for di e director, Gino Winklaar a confirma cu un persona a fayece den KIA.
E director a confirma cu tin dos investigacion cu lo tuma luga relaciona cu e morto aki. Un for di parti di KIA mes, pues un investigacion interno y e otro door di Cuerpo Policial Aruba bou guia di Ministerio Publico. Exactamente con el a sosode, e director no por confirma y tampoco por divulga e nomber di e persona.
For di fuente entre otro den KIA ta sigura cu despues di un partido di basketball, un preso hende homber lo a bay baño y ey ta caminda cu a bin top’e sin bida. Ambulance na prome instante a presenta na KIA pero mucho mas no por a haci. E team forensico di Cuerpo Policial y recherche tambe tabata presente den KIA. Parce e fayecido ta di apodo “Sint Maarten”, ta pendiente mas detaye di e caso aki mirando cu ta trata di noticia den desaroyo.
