Debi na e pandemia y tur e medidanan cu a bin hunto cu esaki, e grandinan cu ta keda na e cas pa hende grandi, S.A.B.A., tabatin hopi tempo sin sali pafo y keiro un rato. E portanan di e instancia tabata cera pa esaki y como tambe pa bishita, familiar of amistoso, te cu dialuna cu a caba di pasa.
Esaki sigur no ta algo placentero pa e grandinan ya cu ta di suma importancia pa haci algun actividad pafo, tuma aire liber y socialisa cu demas hende pafo di e establecimento. Sinembargo, esaki tabata mara na cierto restriccion pa asina cuida di nan salud y evita cu nan contagia cu e virus di covid.
Ivonne Geerman di S.A.B.A a splica cu e unico forma di socialisacion y interaccion cu e grandinan tabatin tabata via videocall y cu tin di nan no tabata compronde pakico nan no tabatin mag di sali. Na momento cu a cuminsa cu flexibilisacion di e medianan pa cu covid, tin di nan a hasta puntra dicon nan no por probecha di esaki pero otro si.
Cu esaki den mente, Shurman Milliard di proyecto ‘Nos Tey’ a bin cu un iniciativa pa yuda cinco persona di S.A.B.A. pa sali un rato y asina laga nan pasa un rato ameno pafo di nan hogar. Asina a hiba nan corta cabey, haci huña como tambe keiro un rato rond di e isla. A termina e dia cu un cena na Gianny’s restaurant. Milliard a enfatisa cu no ta solamente e cinco personanan aki ta bay wordo yuda pero mas bien e ta spera cu esaki sirbi como un señal pa otro persona tambe corda riba nos grandinan.
