Recientemente, Prome Minister Evelyn Wever-Croes a reuni cu Commandant Frank Boots y Commandeur Walter Hansen. Despues di 3 aña, como commandant naval di defensa den Caribe y director di kustwacht, a contract di Frank Boots a finalisa y e lo bolbe Hulanda.
E relacion entre Mariniers Kazerne na Aruba cu Marina Real na Corsou semper tabata uno positivo. Tambe como director di Kustwacht, Commandant Boots tabatin un bon relacion cu Cuerpo Policial y otro instancianan local cu ta yuda pa tene nos fronteranan sigur.
Diahuebs ultimo, dia 24 di augustus 2023, a traspasa a poder pa commandeur Walter Hansen oficialmente na Corsou. Gobierno a gradici Commandant Boots pa tur su añanan di trabou, su bon cooperacion y su esfuerso na yuda tene Aruba su costanan sigur y ta desea Commandeur Hansen tur clase di exito den su funcion nobo.
Como parti di Reino den Caribe tin aproximadamente 800 militar, como tambe personal civil di defensa staciona na e islanan Aruba, Corsou y Sint Maarten. Nan presencia na e islanan den Caribe tin tres cargo importante cu nan mester ehecuta: Defensa di teritorio di Reino Hulandes, stabilidad y estado di derecho y apoyo na autoridad local.
