E ultimo biaha cu un avion di e modelo aki a bula pa Aruba ta casi dos aña pasa, esta na maart 2019, specificamente pa e aerolinea American Airlines. A laga “ground” tur e avionnan pa un inspeccion riguroso. Awor tur cos a keda cla, ayera…despues di tanto tempo sin mir’e, e prome vuelo cu un aparato asina a bolbe aterisa na Aeropuerto Internacional Reina Beatrix.
Tabata ayera merdia pa 2:20 pm cu e avion a aterisa na Aruba cu e vuelo 1028 di American Airlines procedente for di Miami. Pa 3:20pm e mesun avion a sali bek pa Miami for di Aruba. Di acuerdo cu un fuente na aeropuerto, desde awo a cuminsa schedule e mesun tipo di avion aki pa e vuelo entre Miami y Aruba.
Ta dos aña pasa…
Tabata dia 13 di maart 2019 cu Departamento di Aviacion Civil di Aruba a prohibi tur avion di e modelo Boeing 737-MAX, despues di e accidente na Etiopia. E decision aki ta como un precaucion preventivo, sperando riba un investigacion. Ta dos avion a cay den un tempo cortico sin un bon splicacion di e motibo di e desgracia.
Impacto di e decision pa Aruba
Pa Aruba e decision drastico aki lo no tabatin mucho problema pasobra ta e aeroliñanan Canades so tabata uzando e avionnan aki riba nan ruta pa Aruba. Nan mester a cambia avionnan. E decision di Aruba a bin despues cu e regulador di siguridad di aviacion di Union Europeo, a suspende tur e vuelonan di e avionnan Boeing 737 MAX di e fabricante Mericano despues di un accidente na Etiopia unda cu 157 persona a fayece.
Mundo henter a suspende operacionnan di MAX
A anuncia e decision despues cu Inglatera, Alemania y Francia a uni na un ola di suspension di e avion, den cuadro di e accidente y a sigui rapidamente pa un decision similiar di India, loke a lanta e presion pa Merca sigui nan ehempel. E tres aerolinanan Mericano principal ta sigui respalda e modelo di Boeing, apesar cu e cliente, sindicato y algun politico a expresa nan duda riba e siguridad.
Tocante Boeing 737-MAX
E modelo di avion aki di Boeing ta e di 4 generacion di e avionnan Boeing 737, conoci como avionnan cu un “narrow-body”. E tabata e modelo nobo cu a reemplasa e “Boeing 737 Next Generation”. E prome vuelo oficial di e avionnan aki tabata dia 22 di mei 2017. A ground e avionnan na maart 2019 te cu november 2020 debi na dos accidente fatal. A conclui cu Boeing tabata na altura di un fayo pero a tap’e mientras cu FAA di Merca a faya den miho control y inspeccion. Merca a “clear” e avionnan aki pa bula desde november 2020 mientras cu Canada a duna OK na januari 2021. Despues di acusacionnan di fraude, Boeing a bay di acuerdo pa paga un multa di no menos cu 2.5 biyon dollar Mericano pa e fayonan aki!
