Tabata na luna di mei ultimo, cu mr. Gerlien Croes a distancia for di Partido AVP y a bira un miembro independiente den Parlamento di Aruba. Mesora a sigui un proceso di consulta cu su votadonan, conseheronan y cu comunidad general, riba kico lo mester bira su futuro den politica. Den e proceso el a haya invitacion di Miguel Mansur di Partido Accion 21 pa e join e partido, pero finalmente el a nenga e proposicion.
Despues di hopi evaluacion…
Awe, durante un entrevista exclusivo den ENFOKE durante noticia di merdia, a puntr’e riba su futuro politico. “Masha danki pa e pregunta Patrick, t’un pregunta cu mi ta haya diariamente. Patrick, mi ta bay ta hopi honesto, hopi consulta, hopi combersacion e ultimo lunanan y na un cierto momento bo ta yega na un crusada unda bo tin cu tuma e decision di con bo ta sigui dilanti. Cu mi ta sigui den politica, esey ta definitivo, mi no ta bay laga politica. Y mi ta, pocopoco, inclinando mas pa inicia un organisacion nobo na Aruba”, asina Gerlien Croes a contesta riba e pregunta specifico di kico ta su futuro den politica.
A bisa “no” na e proposicion di Miguel Mansur
Riba e pregunta cu si, definitivamente, no lo tuma e oferta di Miguel Mansur di Accion 21, o sea cu e no a bisa “Yes” na e proposicion, el a contesta “No, mi no a bisa Yes”. Cu esey, e opcion pa uni su mes na Accion 21 ta for di mesa tambe. Bay riba su mes lo nifica un partido politico mas den e contiendo electoral, net locual Miguel Mansur no kier. E ta sinti cu mas partido chikito asina lo traduci den mas rest-zetel cu tradicionalmente ta bay pa e partidonan mas grandi. E lo a prefera pa tur a uni den un solo partido y hacie fuerte, pero obviamente lo no logra den e intento pasobra cada ken tin otro prioridad, otro pensamento y na final tur lo ta lider.
No tin nomber ainda
Gerlien Croes a comenta cu e ta keto bay den e proceso di consulta y cu ohala pronto e por anuncia oficialmente kico e futuro lo bira. Pero e ta kere sigur y ta convenci cu Aruba tin necesidad y Aruba tin espacio pa politico hopi mas integro y cu tin stimacion di berdad p’e pais aki.
E gobierno aki ta cabando cu pueblo
N’e forma aki Aruba no por continua mas. Esey ta e realidad, el a bisa. Y Gerlien Croes ta hopi desepciona pa mira declaracion di minister-president diaranson mainta. Aruba mester papia kico ta bin dilanti, kico tin cu bay haci pa e futuro di e pais aki. Aruba tin hopi reto, el a splica. Ya na cierto momento, si mira loke a sosode entre diamars y diaranson, no ta aceptabel mas.
Gana confiansa bek di e pueblo votado
Gerlien Croes a comenta cu e realidad ta cu mester ta hopi preocupa riba e participacion di votado den e proximo eleccion, cu ta un realidad. Tin asina hopi decepcion den comunidad y ta mira tambe cu hopi persona ya no ta wak un alternativa. Hopi importante ta pa purba engage e 11 mil hendenan cu no a participa den e ultimo eleccion, pa atrae nan pa vota den e siguiente eleccion si.
Nada di “fly by night”
Tambe tin reparticion di restzetel cu ta stipula pa ley na cierto forma cu enberdad ora cu ta bay haya conteo na final di dia, por faborece e partidonan grandi. Hopi biaha a yama e partidonan chikito “fly by night”. Gerlien Croes a bisa algun tempo pasa, cu cuidao cu Aruba no haya un sorpresa cu tin un “fly by day.”
Generacion nobo = ideanan nobo
Aworaki tin un necesidad y un sentimento fuerte den pueblo cu ta basta cu e forma cu a experencia tur e añanan aki. Si esaki ta loke kier sigui cu ne p’e futuro generacion, pa nos yiunan, na cierto momento Aruba ta reconoce cu mester un cambio di direccion p’e pais. Aruba mester ta maneha hopi mas zakelijk n’e forma cu e ta maneha.
Tin 21 partido politico inscribi caba
Di acuerdo cu e lista oficial publico pa Conseho Electoral riba e website di Censo Aruba, ta constata cu nos tin 20 partido politico y ta conoci cu un nobo a inscribi recientemente cu no ta publica eyriba ainda. Nan ta Accion 21, Aliansa Democratico Arubano, Aruba su Bienestar Organisacion, Arubaanse Volkspartij / Christen Democraten Aruba (AVP), Cristiannan Uni Reforzando Potencial di Aruba (CURPA), Democracia Real, Partido HTC, Movimento Socialista di Aruba (MSA), Movimiento Aruba Soberano (MAS), Movimiento Electoral di Pueblo (MEP), Movimiento Patriotico Arubano (MPA), Organisacion Liberal Arubano (OLA), Partido Patriotico di Aruba (PPA), Plataforma Politico di Trahador (PPT), Pueblo Orguyoso y Respeta (POR), Pueblo Prome, RAIZ, Red Democratico, Summum Bonum y Union Patriotico Progresista (UPP).
Dia 2 di augustus 2023, mr. Monica Kock, presidente di Conseho Electoral a inscribi e partido politico Lucha pa Reforma (LPR) den e registro di partidonan politico activo na Aruba. Esaki ta e partido cu ta pertenece na mr. dr. Rycond Santos do Nascimento.
Caya ta papia…
“Ainda por spera mas partido”, asina un experto riba e tereno aki y cu tin conocemento di desaroyonan politico, a sigura na nos. Parce cu tin mas politico, cu ta inclina pa lanta nan mesun movemento of organisacion politico. Si tuma nota cu dos politico a bandona AVP y tur dos a opta pa lanta un partido di nan mes, ta mustra cu e apetit eyfo ta biba pa tin mas variacion y opcion pa ora di bay eleccion. Ainda “caya ta papia” cu tin un minister den e gabinete actual cu tambe ta contempla pa cuminsa su mesun partido, o sea pa bay eleccion su so, sin ta mara na ningun partido existente, cu ta bin cu carga di pasado of di retonan di e gobernacion aki mes. Ta di spera cu di awo pa eleccion, lo por conoce un of dos partido politico nobo mas of ta tuma partidonan inscribi pero cu no ta activo mas.
Eleccion 2021
E ultimo eleccion parlamentario di Aruba a tuma luga diabierna, dia 25 di juni 2021. Un total di 70.283 ciudadano tabatin derecho di voto, di cual 59.500 a haci uzo di nan derecho, mientras cu 890 tabata votonan invalido. Na tur, 10.783 persona cu tabatin derecho di voto, a opta pa keda sin bay vota. Consecuentemente, e cantidad di votonan cu tabata valido e dia ey tabata 58.610 voto, cu mester parti den 21 asiento den parlamento, cu ta hiba nos na un “kiesdeler” di 2790 voto pa cada asiento.
Partido Accion 21, den su prome salida a logra 3410 voto, bon pa un asiento. Partido PPA a logra 1809 voto, cu a cay chikito pa drenta parlamento. Partido MAS, cu liderazgo nobo, a logra 4681 voto, bon pa dos asiento. Partido UPP a haya 621 voto. Partido MEP a logra 20.700 voto, bon pa nuebe asiento. Partido HTC a logra 249 voto, Partido POR a haya 661 voto, Partido Pueblo Prome a logra 574 voto, Partido CURPA a haya 312 voto y Partido RED a haya 1784 voto. Partido AVP a alcansa 18.335 voto, bon pa 7 asiento, mientras cu RAIZ a haya 5474 voto, bon pa 2 asiento. E partido cu mas voto ta MEP y menos voto tabata HTC.
Tabatin un total di cinco “restzetel” cu a parti entre cuater diferente partido politico. Partido MEP de facto a haya 7 asiento y a haya 2 extra. MAS a haya 1 asiento y a haya 1 extra. AVP a haya 6 asiento y a haya 1 extra, mientras cu Raiz a haya 1 asiento pero a haya 1 extra.
E politiconan cu a logra mas voto den e ultimo eleccion ta:
- Evelyn Wever-Croes – MEP (Votegetter) cu 7518 voto
- Mike Eman – AVP cu 6668 voto
- Marisol Lopez-Tromp – MAS cu 4191 voto
- Dangui Oduber – MEP cu 2060 voto
- Miguel Mansur – Accion 21 cu 2019 voto
- Ursell Arends – RAIZ cu 1939 voto
- Glenbert Croes – MEP cu 1929 voto
- Gerlien Croes – AVP cu 1919 voto
- Xiomara Maduro – MEP cu 1883 voto
- Benny Sevinger – AVP cu 1614 voto
Tocante Gerlien Croes
Gerlien Luzdiane Croes a nace na Spijkenisse, Rotterdam, na Hulanda dia 7 di februari 1987, loke ta nifica cu e tin 36 aña di edad. E tin dos yiu homber, Nate-Anton di 9 aña y Terrence di 7 aña.
Na aña 2007 el a finalisa su estudio di VWO y na 2013 a gradua na Universidad di Maastricht, Hulanda, como hurista den ley internacional y ley Europeo y como tal e ta posee e titulo di Meester in de Rechten.
El a traha 2 aña den sector priva na Hulanda den e industria di gas y petroleo y na 2015 a bolbe bek Aruba cu su famia. Desde 2016 Gerlien ta fungi como Consehero di maneho na Oficina di Relacionnan den Reino y Union Europeo.
Na aña 2017 Gerlien a haci su entrada den politica como candidato di Partido AVP y ricibi sosten di 982 votado, mientras cu na eleccion di 25 di juni 2021 el a ricibi 1919 voto riba su nomber y asina bira e di dos votegetter di su partido. Pa di dos eleccion consecutivo, Gerlien ta posiciona su mes como di 3 hende muhe cu mas hopi voto na Aruba. Na mei 2023, despues di un diferencia di opinion interno, el a opta pa tuma su retiro for di Partido AVP y a bira un miembro independiente den Parlamento di Aruba.
