No ta un trayecto cortico, sino henter un carera largo y impresionante, basa riba lealtad na e famia di MCB y CMB, bou supervision e tempo ey di defunto Lio “Paps” Capriles, cu e bankero Arubiano, Javier Wolter a desplega cu Caribbean Mercantile Bank. Awe, despues di 38 aña di trabou cu CMB, el a informa tur trahado cu e ta tuma su retiro inmediato y ta bandona e banco. E ta habri caminda pa sanger hoben crece y forma un carera bancario.
Pero, fuentenan ta sigura cu esaki ta “algo” cu a start desde Dia di Betico, dia 25 di januari. Kico a sosode no ta conoci ainda, pero hecho ta cu a manda busc’e cu avion priva na aeropuerto di Aruba pa hib’e Corsou unda el a tende di su superiornan eynan cu mester separa for di otro. E motibo obviamente lo keda entre e murayanan di MCB na Corsou.
Entretanto aki na Aruba, Caribbean Mercantile Bank lo sigui bou manda di Paul DeWolfe, den funcion di Managing Director, procedente di Bank of Nova Scotia di Canada, doñonan minoritario di MCB-CMB. Aña pasa Paul DeWolfe a yega Aruba pa tuma maneho di e banco over, segun e acuerdo cu Canada, pa cambia director cada 3 pa 4 aña.
Futuro pa Javier Wolter no ta conoci ainda, pero ta un bankero di trayecto largo y semper fiel na CMB y cu awor ta disponibel riba mercado.
