Arubaanse Voetbal Bond (AVB) a tuma nota di e incidente cu a tuma luga den fin di siman caminda a agredi referee Luis Bedoya seriamente na un torneo amistoso. E torneo aki tabata organisa p’e team di futbol SV LA Fama. AVB kier expresa su sosten pa referee Bedoya y ta manda deseo di pronto recuperacion.
Cuerpo di Referee a acerca AVB diadomingo prome di october pa expresa nan preocupacion riba e agresion cu ta escalando contra e oficialnan. Nan a informa AVB di nan decision, cual ta uno dificil, di no fluit ningun wega mas te ora tuma e miho medidanan pa mitiga e parti di agresion contra e refereenan.
Esaki a pone cu AVB a suspende e weganan cu tabata programa pa tuma luga diadomingo, prome di october, te cu proximo aviso mirando cu e refereenan a indica cu nan no lo traha door di e incidente di diasabra ultimo.
AVB ta trahando activamente pa un solucion. Mientrastanto, e weganan no lo tuma luga tanten AVB y e refereenan ta den deliberacion. E meta ta pa por yega na otro mas lihe cu ta posibel.
Pronto AVB lo comparti mas informacion ora esaki ta disponibel.
