Wingo lo brinda dos servicio directo semanal pa/for di Medellin – Aruba riba diaranson y diasabra abordo di nan avion B737-800 cu capacidad di 189 asiento. Riba diaranson e vuelo lo sali for di Medellin 2:18 PM. E buelo di regreso lo sali for di Aruba 5:56 PM. Riba diasabra e vuelo lo sali for di Medellin 10:08 AM, yegando Aruba 1:08 PM. E vuelo di regreso lo sali for di Aruba 1:46 PM y yega Medellin 2:30 PM.
Esaki ta traduci den aproximadamente 3,000 asiento adicional pa/for di Aruba. Cu e servicio adicional desde prome di october 2022, Wingo lo opera en total 5 vuelo semanal for di Colombia: 3 for di Bogota y 2 for di Medellin.
Actualmente e ruta directo pa Medellin ta wordo ofreci solamente door di Sarpa Airlines, cu tres vuelo semanal. Esaki ta nifica cu Aeropuerto Internacional Reina Beatrix (AUA Airport) lo tin 5 vuelo semanal nonstop pa/for di Medellin desde prome di october 2022.
Aruba Airport Authority N.V. (AAA) su Air Service Development Manager, Jo-Anne Meaux-Arends tabata invita door di aerolinea Wingo pa ta presente na Medellin pa un anuncio excitante unda e aerolinea partner a anuncia cu lo agrega dos servicio directo nobo, banda di nan servicionan existente entre Bogota y Aruba.
Club Union na San Fernando Plaza (El Poblado) tabata e sitio scogi pa haci e anuncio aki den presencia di e Hunta di Turismo di Medellin y representantenan di e gobierno di Antioquia como tambe prensa Colombiano. Presente na e conferencia di prensa tabata Secretario di Desaroyo Economico di Medellin, Alejandro Arias, e CEO di Aeropuerto di Medellin Fredy Jaramillo, General Manager di Wingo, Jorge Jimenez, Miriam Dabian, Director General pa ATA Latinoamerica y Jordan Schlipken-Croes, Business Development Manager di Aruba Tourism Authority Latinoamerica.
“Wingo a cuminsa bula pa Aruba bek na december 2016 como e prome Low-Cost Carrier pa sirbi Aruba for di Colombia. Brindando mercadonan local y di placer prijsnan abou, bon ambiente y hopi flexibilidad. Nos ta encanta mira con e mundo di aviacion ta trese hende, cultura y negoshinan hunto. Nos ta felicita Wingo como un partner importante y valioso y di awo caba nos ta ansioso pa dia prome di october pa den un forma festivo, nos yama e vuelo inaugural bonbini na AUA Airport,” asina Jo-Anne Meaux-Arends, Air Service Development Manager di Aruba Airport Authority a expresa.
