E unico localidad cu ta habri tur dia di dialuna pa diasabra tawata Centro Libertador Betico Croes. Club Don Bosco na Noord y Santa Teresita Center na San-Nicolas a traha ambos 3 dia den siman. Pero desde dialuna 29 di maart 2021 Santa Teresita y Den Bosco tambe lo vacuna di dialuna pa diasabra for di 8:30 am pa 11:30 am y di 2:30 pm pa 5:30 pm.
Di e forma aki ta aumenta e cantidad di vacuna cu ta duna pa dia aun mas. Actualmente ta vacunando un averahe di 1200 persona pa dia pero awor cu ta bay over na vacuna esunnan cu malesa cronico of condicion di salud hunto cu trahadonan cu ta bin den contacto cu hopi hende manera entre otro polis y maestronan di scol, ta necesario pa amplia e capacidad di vacunacion pa dia aun mas.
Desde dialuna tambe MFA Savaneta ya no lo fungi como localidad di registracion mas, e localidad pa registra pa pariba di brug entrante dialuna 29 di maart lo bira Santa Teresita Center na San Nicolas, situa net pabou di misa na San Nicolas. Orario pa registra na Santa Teresita Center ta di dialuna pa diasabra for di 8:30 am pa 11:30 am y 2:30 pm pa 5:30 pm.
E otro edificionan di MFA esta Santa Cruz, Paradera y Noord si lo sigui fungi como localidad di registracion
