Dia 23 di juli ultimo cu 24ora.com a haci un entrevista cu Diana Velasquez, habitante di Tanki Leendert, unda el a vocifera su preocupacion riba e veld cerca di Colegio Ora Ubao. Ta un pida tereno cu dos container bandona cu a bira practicamente un centro di atencion di cosnan negativo. E area aki ta keda cerca di e scol basico, pa scol hopi mucha sa warda nan mayor despues di scol n’e sitio menciona.
Fo’i ora tempran di mainta te cu anochi laat tin diferente actividad den ora di anochi, sin luz den e area y e habitantenan tabata preocupa y kier un solucion pronto. Ta pa e motibo ey mes, Velasquez a sali dilanti y vocifera su preocupacion na nomber di henter e bario. E situacion a bira asina drastico cu por a hasta considera e pida tereno un mini dump. Den un di e containernan a hasta yeg’i topa cu un curpa sin bida.
Awo, despues di e entrevista a nota cu awe mainta esunnan concerni a bin cu truck special y haci e pida tereno limpi. Pa cual ta un desaroyo positivo pa e area. Locual cu a keda falta ta e dos containernan bandona. Ta spera cu pronto por deshaci di nan tambe.
