“For di prome dia te cu awe mi ta cu e banda” ta locual cu Mikey Richardson di Youth Extreme a conta den un entrevista ameno na e studio, caminda cu mayoria di nan exito ta traha. Nan popularidad grandi ta haci cu e pueblo semper kier sa kico ta locual cu nan ta bon cu ne y pa e motibo aki mes a sinta un rato cu Mikey pa haya sa kico tur Youth Extreme tin na caminda.
Locual cu sigur ta algo cu mester ta den agenda sin falta, ta e celebracion di 20 aña di e banda, cu ta na caminda y lo bay ta un conmemoracion explosivo di ambiente y musica.
Pa locual ta trata Mikey su trayectoria, e ta uno largo y for di prome dia cu e banda. Di aña 2004 e ta forma parti como guitarista y vocalista di e banda. Tin hopi preparacion caba tumando luga. Carnaval ta un di e temporadanan cu ta clave pa e banda y pa esaki e contracto cu Don Flip Carnival Group ta firma caba. Nomber di grupo ta Kings and Queens, cu tin su promo riba tur plataforma social caba coriendo rond.
Algun sorpresa ,entre otro presencia di Youth Extreme den seccion di grupo Champaigne Carnival Group, pero Mikey ta sumamente gradicido y contento di informa cu Youth Extreme ta completamente booked/firma pa e temporada di carnaval. Pueblo lo bay scucha y mira e banda tur caminda.
“Cla pa subi caminda y …. je weet”
Tambe a haya oportunidad di scucha di Michael Quandt miho conoci como“Barbon t’ey”, di lo mas nobo cu Youth Extreme a caba di saca riba mercado. Tin di haber tanto riba e celebracion di Aruba su di 70 aña di Carnaval como tambe e 20 aña di Youth Extreme, cu tambe ta hiba e nomber di Kings and Queens.
Mirando e acogida y aniticipacion, cu un temporada grandi tanto pa carnaval como pa e banda mes, Youth Extreme a cuminsa di awo caba cu cancion promocional pa asina yena e fanaticada cu e ambiente y musica dinamico cu nan ta presenta, pa asina drenta den e gara di e temporada.
E produccion promocional ta riba red social caba, algo ‘hot’ manera semper nan ta presenta. Un producto netamente propio. Grabacion, editacion y produccion di e material ta den man di diferente integrante mes, incluyendo Mikey y Michael mes.
Por spera mas produccion, esaki ta djis e chispa, nan lo sigui bin un tras di otro, asina ta spera hopi mas di Youth Extreme. Mirando cu e banda a haya hopi reconocemento durante carnaval, a haci e pregunta si ta cla pa bolbe pone drama di ambiente. Mikey di biaha a contesta cu nan ta cla pa e challenge sin duda, musicalmente nan ta challenge nan mes y semper buscando exito y miho resultado.
E banda ta bay haci 20 aña den farandula y ta algo cu tin e banda hopi emociona y cla pa locual cu e temporada lo trece cu ne.
Como miembro di un banda cu a nace ora musico hoben a yega hunto, e ta un empuhe na tur otro hoben. Mikey cu un palabra di conseho na tur hoben, pa sigui nan soño. Si bira un cantante of musico ta den e soño ey, bay p’e y no descurasha debi na palabra di otro. Na final hende ta bin y bay y bo soño ta keda para.
