E no ta un persona desconoci den e mundo di husticia, Carl Wauben ta su nomber. Un polis pensionado cu a traha hopi aña na Aruba. El a cuminsa su carera policial manera tur polis, for di scol di polis, pa polis uniforma, pa straat dienst, recherche y den su ultimo periodo como polis, a traha den e departamento di narcotica di polis.
Despues di a cumpli cu su trabou cabalmente den Cuerpo Policial, el a sigui su bida den sector priva pero na nos hermana isla, Corsou. Ey Wauben a lanta su propio compania di siguridad y a traha den dies aña adicional, pero specificamente na Aeropuerto Internacional Hato na Corsou.
Como cherry riba bolo, famia hunto cu Wauben a dicidi cu lo celebra su di setentiochi aña na Aruba. N’un compleho di fiesta na Piedra Plat a celebra su bunita edad di 78 aña. E fiesta a bay man den man cu dushi snacks, bebida y locual cu no por a falta ta e Mariachi. Durante un entrevista cu Carl Wauben, a puntr’e kico ta e secreto pa tin un bida asina largo y yena cu salud. Wauben su prome palabranan tabata: “Cumpli cabalmente cu reglanan existente!”
Wauben a duna algun conseho pa tur polis. E ta kere fielmente den e proceso di crece den e cuerpo. E ta valioso mirando cu bo ta gana experencia durante henter e proceso. Locual ta mas importante den e trabou, ta ora bo ta traha imparcialmente, no laga nada influencia bo, pio ainda; politica, tabata palabranan di Carl Wauben.
Su amigo y ex-colega y alabes ex-vocero di polis, Papito Cominencia tambe tabata presente n’e fiesta. Papito a hunga un rol grandi pa cu e encuentro aki. E tabata encarga pa trece mayoria di ex-colega y amigo di Carl cu awendia ta pensionado, pa nan ta invita na e fiesta aki. Carl Wauben a keda impresiona ora el a mira dos mesa yena cu polis pensionado y pa colmo ta su ex-coleganan.
