Ministerio Publico y Cuerpo Policial di Aruba a tene na November y December 2022 un accion pa recolecta arma di candela ilegal, caminda hende por a entrega arma di candela sin core riesgo di persecucion despues.
Cu e meta aki, a pone container special color blauw, na warda di polis na San Nicolas y na Oranjestad.
Hende a haci bon uzo di e oportunidad aki. Total a entrega 8 arma, di cual 3 ta pistool, 3 ta revolver y 2 ta arma di presion di gas (BB-guns). Un BB-gun ta sirbi pa menasa hende cu ne y p’esey nan tambe ta prohibi.
Ademas a entrega mas of menos 500 pida municion.
E containernan blauw, den cual e armanan tabata entrega, ta para na e mes luga na warda di polis na San Nicolas y Oranjestad.
Si tin cualkier persona lesando e relato aki, cu kier laga un arma, parts di un arma of bala den e container, na San Nicolas of na Playa sin cu esey tin castigo, anto ta keto bay posible.
Lo habri e containernan di nobo, diasabra 4 di maart venidero y lo ta habri te cu dia 4 di juni 2023. Durante e periodo aki lo ta posible pa entrega otro tipo di arma tambe, manera por ehempel cuchiu, machete, skin-ups y pepperspray.
Na inicio tabatin ainda e cuestion cu tin camera dirigi riba e containernan, pero mientrastanto tur hende sa cu a kita e cameranan. Tur hende por, anonimamente, entrega arma of municion.
Ministerio publico y polis ta haci, un biaha mas, un yamada urgente na cualkier persona cu tin arma na cas of cu tin conocimento di un arma, pa bin entrega esaki. Banda di arma di candela, ta ricibi awor tambe cuchiu y otro tipo di arma. Peticion di polis ta pa entrega e arma di candela paketa, pa evita malintendemento y/of accidente. Pa locual ta trata e otro tipo di armanan, no mester paketa esakinan.
Cu entrega di arma y bala, Aruba lo bira mas safe. Ban nos tur pone di nos parti pa tene nos isla un luga safe.
