Milan Antonio Pimienta, naci dia 7 di november 2014, pues di apenas ocho aña di edad, a planta respet den e Florida Elite Track 2023, cu a tuma luga dia 9 di april ultimo na Orlando, Florida. Milan ta yiu di Piero y nieto di Ramon Pimienta. El a sali na di tres luga memey di 30 otro coredo den un competencia cu a conta cu riba mil participante for di tur parti di mundo.
Milan a participa den e Florida Elite Invitational, categoria Boys 400 meter Dash 9 year old banda di 30 otro coredo di su mesun edad. El a resulta na di tres luga durante e competencia.
Na prome luga a keda Shane Robinson cu tempo di 1:03 minuut, na di dos luga Lynson Saint-Germain (Rank # 4 di Merca den su categoria) cu tempo di 1:04 minuut y na di tres luga a keda Milan Pimienta cu tempo di 1:08 minuut. Cu esaki Milan a kibra su propio record di 1:13 minuut. Cu e resultado aki Milan awo a classifica pa e World Youth Championship cu lo tuma luga proximamente na Bahamas.
E hoben Milan Pimienta ta participa activamente den coremento desde cu e tabatin cinco aña di edad. Su prome careda tabata na aña 2020 y a resulta exitoso den su categoria. El a gana mayoria careda cu su 5, 6 y 7 aña di edad. Pero, awo e ta confronta e reto cu na Aruba no ta existi e categoria ey di 8 aña di edad. Consecuentemente su tata a opta pa busca un coach priva, den persona di Silvienne Valdez-Krozendijk. El a yud’e desaroya den e deporte di coremento y hasta a baha su tempo di tal forma cu awo e ta cla pa bay bataya na Bahamas.
Milan ta activo den otro disciplina di deporte tambe. E gusta move henter dia y su mayornan ta percura pa mantene un bon balansa entre scol y deporte. Pabien Milan y sigui planta respet y tene e bandera di Aruba na halto!
