Awe mainta a tuma luga e ceremonia den cual a presenta e gobernador interino nobo, kende lo bay reemplasa e gobernador interino saliente, esta sra. Yvonne Lacle-Dirksz. Asina a bin presenta Su Excelencia sr. Agustin Vrolijk. Presidente di parlamento Edgar Vrolijk a splica cu den un reunion solemne e gobernador interino pa pais Aruba mester presenta un transcripcion di e decreto real y e acta di huramentacion cu ta decreta e persona encarga cu gobernador interino na prome ocasion cu e fungi como tal.
Cumpliendo cu esaki, ayudante di gobernador a entrega na parlamento e documentonan concerni caminda Su Excelencia Gobernador Interino sr. Agustin Vrolijk ta actua como gobernador interino pa pais Aruba. Asina a bin ta yama bonbini na e gobernador interino y den nomber di e pueblo Arubano a felicita su excelencia gobernador y a dese’e un bon trabou di e continuidad di locual tabata realisa caba.
Tambe a bisa cu e gobernador interino ta conoci como un persona confiabel, un persona cu hopi iniciativa y hopi entiusasmo, un persona preciso, envolvi y cu ta gusta dirigi riba resultado. Un persona cu ta cla pa yuda y uni otronan. A fungi tambe como maestro di enseñansa primario y ocupando carga halto den maneho di pais Aruba, entre otro, a fungi como director di departamento di Aviacion Civil, director di Asuntonan di Stranheria y algun mas.
Den palabra di Su Excelencia Gobernador Interino sr. Agustin Vrolijk, tanto e mes como su famia ta sinti nan mes honra pa esaki y ta sumamemente agradecido na un y tur cu a haci esaki posibel. Segun su excelencia a sigui splica e trabou di un gobernador interino ta consisti di dos parti, e gobernador ta representa e gobierno di Aruba y e gobierno di Reino. Den esaki sigur e representante di e rey mester atene na cierto punto den e texto di huramentacion. Entre otro, pa haya e posicion aki, e persona en cuestion no a priminti ningun hende nada, cu e lo promove e adelanto di Aruba manteniendo su mes na e constitucion di Arubay e reglamento di ordo pa gobernador.
“Mi a pidi Dios todopoderoso pa yuda mi cu ehecucion di mi funcion honorabel nobo y pa sigui guia mi pa sirbi mi pais dignamente” tabata e palabranan di su excelencia gobernadora interino. Asina a presenta su mes na parlamento y na e representantenan di comunidad Arubando y a declara su boluntad pa traha pa progreso di Aruba.
Lider di fraccion AVP, Mike Eman a bisa cu esaki sigur ta e momentonan solemne pa pais Aruba ya cu ta for di nos propio comunidad ta sali e personahenan cu mester carga diferente instituto cu ta haci nos un pais y ta brinda nos oportunidad pa maneha y dirigi nos pais. Den tur esaki, a scoge un gobernador pa marca e relacion entre Aruba cu Reino. Pues segun Eman, ta importante pa haci refleccion profundo riba e personahenan aki y awe sigur tabatin transicion di un personahe cu a marca su carera cu hopi impresion riba Aruba, referiendo na gobernador interino saliente sra. Yvonne Lacle-Dirksz, gradiciendo pa e tremendo trabou desplega.
Segun Eman, e transicion pa Su Excelencia Gobernador Interino sr. Agustin Vrolijk tabata uno digno. Asina el a splica cu su excelencia tambe ta un personahe conoci den nos comunidad y a carga diferente funcion den nos comunidad y a haci esaki cu honor y dedicacion y den esaki ta sostene sigur den e trabou cu e tin cu bay eherce, specialmente considerando tur e retonan cu pais Aruba ta enfrentando actualmente.
Prome Minister den nomber di Gobierno di Aruba, ta felicita Su Excelencia Agustin Vrolijk den su funcion di Gobernador Interino di nos pais. Alabes, Prome Minister ta gradici Gobernador Interino saliente, Señora Yvonne Laclé-Dirksz pa su 5 aña den e posicion aki di un forma hopi digno na unda cu el a enfrenta varios reto na un manera ehemplar.
“Mi mester bisa cu pa mi como Minister President, e 4 añanan aki Señora Yvonne Laclé-Dirksz tabata un sosten hopi grandi na momento cu Gobernador Su Excelencia Alfonso Boekhoudt no tabata na Aruba. Mi ta spera cu e mesun cooperacion por sigui cu Su Excelencia Agustin Vrolijk. Mi ta desea Gobernador Interino di Aruba Su Excelencia Agustin Vrolijk hopi exito y hopi bendicion di por haci e trabou aki den interes di pais Aruba”.
Prome Minister Evelyn Wever-Croes a bishita Señora Yvonne Laclé-Dirksz na Kabinet Gouverneur. Señora Laclé-Dirksz pa e ultmio 5 añanan tawata Gobernador Interino di Pais Aruba. Señora Laclé-Dirksz a sirbi nos Pais y Reino na forma ehemplar, asistiendo caminda cu por cu conseho y guia durante ausencia di Gobernador di Aruba Su Excelencia Alfonso Boekhoudt.
Señora Laclé-Dirksz, pa medio di un carta dirigi na Su Mahestad Rey Willem Alexander, a haci peticion pa Rey concede su retiro di su funccion como Gobernador Interino prome cu fin di termino. Esaki pa dedica mas tempo na su famia.
Prome Minister den nomber di Gobierno di Aruba, ta gradici Señora Laclé-Dirksz pa su dedicacion y servicio den su funccion como Gobernador Interino y ta desea Señora Yvonne Laclé-Dirksz exito y tur cos bon.
