Jeandrick Rodney Omar van der Biezen, Omar Pierce ta su nomber artistico. E tabata kier algo unico y alabes comercial. Asina a bin scoge pa su di tres nomber “Omar” cu ta nifica “Gifted Speaker” y a bin pega su tras “Pierce” cu ta significa “Strong & Impactful”.
Omar Pierce ta bin di un famia musical. Su bisawelo tawata toca acordeon, su welo Casildo van der Biezen ta toca tambor, su primo y prima ta toca den gaita, y esun cu hopi hende conoce den e mundo di farandula ta su tata Rodney van der Biezen. El a toca den hopi banda na Aruba manera cu Vicente Kelly y La Nueva Fuerza, E.Q.O., Exitante, Robert y su Solo Banda Show, Search, Dream, Delicious, Tsunami y na Hulanda a toca cu Pegasaya. Actualmente ta tocando den Cache Royal.
Inicio den musica
Omar Pierce su famia ta conoci tambe den mundo di deporte, baseball pa ta specifico. Semper el a admira e idea cu su tata a scoge pa ta un musico, cual ta lo contrario di loke mayoria di su famia a sigui cu ta deporte. Apesar cu e tambe a cuminsa hunga baseball cu 7-8 aña, toch e tabata den studio cu su tata fo’ichikito. Esaki tabata un di e inspiracionnan cu a cuminsa hib’e den e direccion di musica.
For di e momento ey a cuminsa experencia e proceso di crea musica. Cuminsando na e creatividad, di comienso te final di un cancion. Un di su inspiracionnan di mas grandi tabata y ta pa semper e fenomenal Michael Jackson.
Den su hubentud, cu su 14 aña, el a bin descubri e programa FL-Studio, pa mescla musica. Asina el a cuminsa e proceso di explora cu e programa, door di bay bishita su omo unda e por a download e programa pa prome biaha riba su computer.
Di dialuna pa diabierna e tabata na su omo su cas tras di su computer despues di scol. Te dia el a haya un computer bieu na su wela. Asina a bin instala FL-Studio atrobe, y esaki tabata e inicio di creacion di su propio musica. Na e momento ey, e no tabata e miho den creacionnan pero tabatin un forma unico di expresa su creatividad.
Despues su tata a nota cu el a cuminsa cana su propio caminda den musica. Pa demostra su apoyo el a regal’e un laptop. Esey tabata un motivacion pa por sigui su soñonan, esta pa bira un “music producer”.
Master e creatividad
Entre su 14 y 18 aña, tabata e temporada di mas largo, unda el a siña con pa master su creatividad y prepara su mes pa sali como un artista. Cu su 19 aña a logra saca pa prome biaha un remix official esta “Big Batty” di Karixon y Tribal Kush.
E remix aki a bay viral riba tiktok cu un dance challenge. E release di e cantica aki a habri portanan p’e, unda el a dicidi pa tuma e decision pa dedica su tempo completamente na musica. Den e temporada aki su tata a lag’e cera conoci cu Jonathan Thiel (Jeon) ora cu el a haya e oportunidad pa forma parti di Arvani.
Cu su 20 aña Omar Pierce a bin realisa cu e no tabata completamente satisfecho cu su imagen artistico. E tabata sinti cu e tin mas pa ofrece den e mundo di musica. El a tuma e decision pa sigui cu su soñonan den exterior. Prome paso tabata pa cuminsa graba su mes como cantante, su cancionnan cu e mester a produci. Mensahenan positivo y di sosten cu el a y ta keda haya di su sernan keri ta loke ta apoy’e y encurash’e pa sigui como producer y cantante.
Su prome release como artista oficial tabata“Tu Mirada”, cu tabata un colaboracion di dos cantante, Ezekiel y Vallery.
E dos personanan aki ta canta cancionnan na Spaño. Su inspiracion pa e proyecto aki tabata pa el a crea un combinacion di cantica na Papiamento y Spaño. Di e forma aki el a yega na su version na Papiamento. E cantica“Tu Mirada” a pega pa un bon temporada entre nos islanan den Caribe.
Den apenas un par di luna bibando na Hulanda el a cera conoci cu Winter. E artista aki ta procedente di nos hermana isla Corsou, residencia na Madre Patria. E ta primo di un famoso artista di Aruba, esta “Ataniro”. Winter tin un bon profiel na Hulanda, y algun cancion cu artistanan conoci manera Rich Kalash y Jaido. Combersando cu Winter nan a yega na e idea pa lansa un proyecto hunto.
Den menos di 2 siman, Omar Pierce a produci y graba e cancion. E titulo di e cancion aki ta “Cay Stima”, y mesora Winter a graba su verso y mand’e. Asina nan por a completa e proyecto y ilustra esaki den un video. E cancion a sali dia 25 di november riba diferente rednan social musical. Dialuna, durante e programa di Enfoke, a lansa e video clip den su debut pa Aruba. Por mira e video, subscribe, like and share via e link riba YouTube: https://youtu.be/BAN5z3bvQ3E?si=SgIHnldbEpnUIdZE
Omar Pierce su idioma materno ta Papiamento cu e ta hopi orguyoso di dje y e lo sigui crea musica den nos idioma natal, Papiamento. Loke e no por keda sin comparti cu nos redaccion ta cu di chikito semper el a gusta expresa su mes den e idioma Ingles. Cual a yud’e yega na explora su mes y crusa horizonte musicalmente y personalmente.
Su meta ta pa tur dia e lanta y surpasa su mesun limitenan. Un di su retonan ta pa canta na idioma Ingles. Meta di Omar Pierce ta pa impresiona mas hende cu e por, cu su musica y composicion di su cancionnan.
Lansamento como cantante
Na comienso di su carera musical el a sali como producer dedicando na e mundo di “EDM” cu ta para pa Electronic Dance Music.
Cera conoci cu su trayectorio musical: Na 2021, su prome “Remix” oficial cu e titulo “Big Batty” di Karixon & Tribal Kush.
No a tarda mucho cu el a saca un otro “Remix” cu e titulo “ZADDY” di Ginger & Sharkk & Karixon y e siguiente pa e aña ey tabata un Remix titula “Mexico” di Ritmo Real & Gxsz. Na 2022 a saca “Fin del mundo” un colaboracion cu “Matias”, un cantante internacional di Colombia.
Manera 2023 a habri el a saca un produccion titula “Tu mirada” cu tabata un colaboracion cu “Valery” y “Ezekiel”. Riba e cantica aki cu ta su propio produccion el a sali como cantante pa prome biaha y durante e proyecto aki hopi hende a reacciona super positivo, asina el a dicidi di bira e cantante principal di su propio produccionnan.
Pa finalisa e aña el a tuma e decision pa haci un “crossover” y reta su mes pa subi mercado internacional.
Omar Pierce a produci, canta y graba un album (EP) di 4 cancion cu e titulo “Lost Boy”, gemaster door di Michael Lampe. Esaki lo ta su siguiente debut como un artista, cantando su propio produccionnan, esaki e lo cera 2023 cu ne. Ta un composicion y areglo propio cu e lo subi mercado internacionalmente. Esaki lo sali den di tres siman di december 2023 y lo sigui cu un video clip den 2024.
Pa finalisa Omar Pierce kier gradici Zamirah Hernandez pa su tempo y dedicacion pa colabora den forma su Biografia. Su famia pa e sosten, na tur su friendnan cu ta kere den dje y ta like y share su produccionnan. Na cada artista local y internacional cu ta kere den su vision y produccion. “Boso ta hopi pa menciona pero cada un di boso tin un balor agrega den mi exito di mañan. Danki di Curason, sigui mi riba TikTok, Instagram, FaceBook page @OmarPierce.
“I trust the next chapter, because I’m the author.”
