Ora di puntra Parlamentario Mike de Meza riba su perspectiva pa cu e refineria den 2021 su contesta ta: Di e informacion cu nos a haya, nos tin cu bisa cu mucho perspectiva nos no ta mira den 2021. E gobierno a percura pa kibra un contracto, innecesariamente, cu un operador.
E compania ey, CITGO, tabatin cierto momento mas di 600 persona den servicio. Tabata prome minister Evelyn Wever Croes ta esun cu a insisti cerca e compania CITGO pa finalisa e laso di trabou cu tur e trahadonan ey, pa despues kibra e contracto cu CITGO, “haya e yabi y sigui.”
De Meza, kende den pasado a ocupa e funcion di minister encarga cu asunto di energia, ta haya e caminda cana aki uno lamentabel. CITGo por a cumpli y tabata un di e modelonan como upgrader y tabatin margennan substancial di ganashi, cu ta hacie viabel. Innecesariamente a kibra e contracto pasobra ningun momento CITGO tabata cay bou di e embargo di Merca cu Venezuela. “E ta un compania cu biyones, cu placa pa finalisa e proyecto. E prome minister tabata kier e yabi y e tin’e awo.”
E Parlamentario ta bisa cu e pregunta awo ta: e prome minister tin e yabi di e refineria. Kico e ta bay haci cu ne. Loke nan constata ta cu el a pone refineria riba un “vraag en aanbod”. Mester a busca operadornan renombra cu lo ta dispuesto y tin experencia den industria petrolero, pa studia e posibilidadnan di un business model cu e por bira algo real. Ta papia di inversionnan cuantioso y mester di hende cu sa kico nan ta papia.
Di tur e companianan cu a inscribi, de Meza ta bisa cu e no a mira ningun cu ta di renombre mundial, famoso den mundo petrolero. A cera cabes cu companianan cu no tin ningun clase di experticio den industria di petroleo, nunca a opera un refineria, nunca tabata doño di un refineria y cu nan a firma un Letter of Intent. “E companianan aki mes a publica a admiti cu nan no tin acceso na crudo y no tin experencia. Nan lo bay busca companianan cu sa di refineria pa bira partner. E ta tristo cu un gobierno ta bay cera un acuerdo cu un compania asina, cu no sa di e industria, y e ta carece di seriedad. Loke a haci siman pasa cu masha fanfaria ta un farsa. E ta simplemente un cabay di campaña politico pero cu e ta bira un realidad, sigur cu no. No tin ningun porcentahe di garantia cu por tin un resultado positivo mañan. Tanten cu e gobierno aki sinta no tin perspectiva.”
