No ta Hulanda so ta cuestiona cu Aruba ta bay busca fiansa mientras cu tin un proposicion di Hulanda riba mesa, sin interes y pa cuminsa paga denter di algun aña. Parlamentario independiente Daphne Lejuez a tuma nota di emision di staatsobligatie door di Gobierno, via Landsbesluit, pa 400 miyon florin.
E suma aki, segun ta poni den e Landsbesluit ta bay a base di un interes di 5.5% y ta paga e deficit cu tin di lunanan juli y augustus. E Parlamentario no ta compronde si Hulanda ta ofrece prestamo na cero porciento. “Knops ta bisa cu si sinta na mesa, combersa, lo por yega na un acuerdo y boso ta haya prestamo na cero porciento, di con e ora mester subi mercado y busca prestamo na 5.5%. Esaki simplemente ta hinca Aruba den mas debe. Cu ki proposito, mi no ta caba di compronde.”
Di loke por a compronde, ta papia di maximo 400 miyon pero loke cu Aruba tin mester urgente ta 136 miyon florin. El a haci un calculo riba e 400 miyon y esaki ta nifica mester 176 miyon florin na interes so den 8 aña Pues e total di suma cu mester tin paga pa aki 8 aña ta 576 miyon florin. Su preocupacion ta di unda Aruba ta bay saca e 576 miyon florin. “Si aki 8 aña no tin e cen, mester bolbe haci un fiansa pa paga e suma aki. Ta bay keda paga interes riba interes y mi no ta mira con esaki ta bay yuda Aruba,” e Parlamentario ta bisa.
E miho solucion pa Aruba den momentonan di crisis ta pa sinta na mesa cu Hulanda y yega na un acuerdo.
Den campaña a papia di Mega-Debe y si mira cu kier bay sigui placa apesar di otro oferta di Hulanda, e Parlamentario ta haya cu esaki ta mustra manera un conflicto di interes. Si kier baha e debe, mester mira e pasonan cu ta bay tuma pa yega na esey. Y si tin oferta riba mesa cu cero porciento, y cu Hulanda bisando cu mester pasa e canalnan normal, CAft pa mustra cu tin e deficit. “Mi ta haya cu esey no ta nada abnormal.”
E hecho cu Minister di Finanza a expresa cu Lejuez no a compronde e asunto di prestamo, tambe el a contradeci e mandatario. “Mi ta compronde e material suficiente pa sa kico ta para den e decreto. Ta p’esey mi a publica e MB. E no ta cuestion di loke ami a bisa. Pero mi a lesa cu kier bay presta te na un maximo di 400 miyon florin. Si logra e meta ey ta crea un debe adicional pa e pais di 176 miyon florin. Esaki siendo cu tin otro opcion riba mesa.”
Aruba ta liber pa fia, pero e consecuencia ta e perfil financiero di Aruba cu ta na peligro. Na final ta Hulanda ta esun cu ta para responsabel pa Aruba.
Pa finalisa, Parlamentario Lejuez a bisa cu e ta brinda su apoyo na Prome Minister pa yega na un acuerdo cu ta e miho pa Aruba. Sinta na mesa cu Hulanda pa yega na e acuerdo aki. Tampoco e ta kere cu e miho manera ta pa duna declaracion unda ta ofende Hulanda, esun cu bo tin cu negocia cu ne. “Na final e decisionnan tuma mester ta responsabel.”