Un cantidad simpatisante a presenta na Centro di Bario Playa Pabao, pa asina candidato number 3, Dangui Oduber, actual minister di salubridad, turismo y deporte, pa compañ’e pa e deposita su voto. Su simpatisantenan a mustra y vocifera e confiansa cu nan tin den nan partido y e maneho di Gabinete Wever-Croes e ultimo cuater añanan, cu a mustra di ta uno hopi positivo, den nan opinion.
E sostenedonan a para cant’i caminda pa asina ricibi Dangui Oduber hunto cu su famia.
Na su salida, el a comenta di ta contento cu un grupo masha grandi a compañ’e. Aruba a celebra y ta mustra cu democracia ta mas grandi cu nunca.
E ta urgi na tur hende cu no a vota ainda, sali bay vota, haci uzo bo derecho. Tambe pa respeta derecho di voto di pueblo, pasobra ta p’esey pueblo ta vota cada cuater aña.
Oduber ta desea tur partido politico y tur candidato exito y ta sinti cu lo ta recompensa pa tur trabao cu nan a bin ta haci. Desde cu a drenta gobernacion, nan a haya nan mes cu un situacion dificil, cual ta e pandemia.
A sa di maneha esaki. Tambe nan tabatin un bon programa di vacunacion, un bon vision con pa recupera nos turismo y economia y awo por sinti con pais ta progresando. Madiki tabata manera kibrahacha, indicando cu partido MEP lo bay cu e victoria aplastante.
Partido MEP
Gilberto F. “Betico” Croes a funda Movimiento Electoral di Pueblo (M.E.P) dia 9 di Februari 1971. Lidernan desde su fundacion tabata Gilberto F. “Betico” Croes, Nelson Oduber y Evelyn Wever-Croes. A participa 17 biaha den eleccion. Record maximo di voto: 25,172 (2001) y record minimo di voto: 8095 (1973). Den e ultimo eleccion na September 2017, Partido MEP a logra 22,061, bon pa 9 asiento den Parlamento. Nan ideologia ta social democrata.
