Tur hende ta papia bunita di e postura di Misha Raymond (Raizx) den Parlamento diahuebs ultimo. Den dicho reunion e parlamentario aki a tuma e postura cu si no pasa su iniciativa di ley, pa inclui Logopedie den pakete basico di AZV e lo no vota pa e ley di BBO na Frontera. Esaki sinembargo ta algo cu por a evita, na opinion di Minister di Salud Publico Danqui Oduber.
AZV ta cay bou di Oduber pa cual e ta haya cu esaki ta algo cu por a evita, esta no ta algo cu mester a trece di e forma aki den Parlamento. “Mi a bisa cu esaki no ta corecto y a bisa sra. Raymond mes durante e reunion cu locual el a haci no ta corecto. E no ta e plataforma pa atende cu preocupacionnan cu por existi cerca dje. Mi sa cu e ta hopi insistente pa ehecuta e mocion cu el a presenta.”
A pesar di esey, e mandatario a bisa cu e por splica cu for di momento cu e parlamentario di Raiz a presenta e mocion aki na november, 2021, a tuma accion mesora. Mocion ta deseo di miembro di Parlamento y no por ehecuta tur mocion tampoco cu presenta. E mester cana su caminda legal y e mandatario a bisa cu e no por keda sin menciona cu DWZ ta traha cu escasez di personal. P’esey e proyecto di ley aki no a cana cu e rapidez cu ta desea pa cual ta lamenta cu a trece e tema di e forma aki den Parlamento di forma innecesario. Por a evita pasobra e ta un proceso cu ta yegando su fin. “Loke a trece dilanti no tabata corecto.”
El a bisa cu diferencia di opinion den coalicion no ta algo straño. E ta algo cu semper por sosode, hasta den oposicion si mira e situacion di AVP cu a perde dos miembro. E mandatario ta kere cu diferencia di opinion ta algo sano y cu mester sinta na mesa pa delibera riba e tema y yega na un consensus. Ora cu Logopedie bira un realidad, e ta algo un bon causa cu lo sirbi y lo yuda tur esnan cu mester di e cuido specifico aki.”
