Durante conferencia di prensa un biaha mas Minister di Salud Publico y Turismo, Dangui Oduber, a reacciona riba loke director di Dr. Horacio E. Oduber Hospital, Jacco Vroegop, a bisa. E mandatario ta para riba cu loke e director a haci no ta bon.
E mandatario a expresa cu no ta na su luga cu director di un hospital ta expresa su mes di e forma aki. E ta contradeci su mesun dato, su propio estadistica cu e ta comparti cu Ministerio di Salud. E ta algo incomprendibel pa Oduber con un director di hospital ta bisa cu vacuna no ta duna resultado. Pero na momento cu hospital tabata experenciando su peak di cantidad di atencion na momento tabatin 116 persona interna. Un total di 82% dje personanan aki no tabata vacuna.
Aki ta un prueba con vacuna a yuda pa preveni cu hende a bira mas malo te hasta fayece. N’e momentonan ey no tabatin capacidad mas di cama na hospital, esey a pone cu a manda 35 pashent Colombia. Esey a bin pasobra no tabatin e capacidad y e vacuna a yuda surpasa e momentonan dificil. Segun Oduber, e ta lamenta e expresion y a expresa esey n’e director di hospital. Tur hende tin derecho di expresa nan pensamento sea ta personal of di experencia, el a indica. Pero na momento cu kier expresa opinion, mester haci esey cu e berdad dilanti.
Oduber a bisa cu mester papia e berdad y no mita, pasobra di tur e lunanan cu a pasa, e mesun director a comparti tur cifra cu ministerio. Den e cifranan por mira claramente cu e gran mayoria di pashent interna den hospital, no tabata vacuna. Ta trata un cifra riba 80%. E kier sa con un director por bisa den un entrevista cu e vacuna no a duna resultado. E director mes tin di contesta kico a yuda e hospital. Basa riba e cifranan comparti dje director mes ta comproba y demostra cu e vacuna a yuda. Sea e ta lubida cu e mes ta comparti e cifranan cu ministerio of e mes kier a crea un sensacion innecesario pa crea duda den programa di vacunacion.
Pa un cobertura mas amplio lesa e edicion di TREMPAN di mañan.
