Fin di siman pasa tabata tin dos manifestacion, uno di pro famia y esun pa redefini e structura di famia. E resultado di e 2 manifestacion ta cu e pueblo cristian, cu pa gran parti ta votadonan di MEP, ta disgusta. E mesun disgusto a wordo expresa tempo cu e amienda 7 a bira realidad dia 8 di september 2016.
E disgusto ta dirigi principalmente na e lider di MEP, pasobra a bira cla cu ta e lider di partido MEP ta e celebro tras di e amienda 7. Ora e prome amiendanan a wordo tira den bari sushi, e lider di MEP ta esun cu a introduci e amienda 7 hunto cu partido Democracia Real y partido AVP. Lider di partido MEP mester a bay den nucleo di partido MEP pa calma e votadonan di partido MEP cu e promesa falso cu e lo no permiti e ley di codigo civil cu ta encera e geregistreerd partnerschap drenta na vigor.
E promesa falso a keda te cu dia prome di maart 2021 ora gran mayoria di e parlamentarionan di partidonan MEP, AVP, RED y POR a vota pa geregistreerd partnerschap wordo aproba y asina den mesun aña den luna di september 2021 drenta na vigor. Resultado di e votacion den parlamento tabata 17 parlamentario a vota na fabor y solamente 4 tabata contra.
Den partido MEP tabata tin parlamentarionan supuestamente cristian cu POR a marca e diferencia door di kita nan sosten y gobierno lo por a cay prome cu dia 1 di maart 2021 y e ley lo no a wordo aproba den nos Parlamento. Lamentablemente no tabata tin curashi pa kita nan sosten for di gobierno.
Minister Arends cu a ricibi e manifiesto pro famia, en bes di a keda imparcial y para pa e bienestar general, deliberadamente a duna un reaccion cu en todo caso NO ta para pa e famia tradicional. Nos no sa si e ta nan of e no ta nan, pero un cos ta sigur el a subi caya hunto cu e grupo minoritario cu ta exigi pa redefini e structura di e famia crea pa Dios.
Nos por mira claramente cu e ministernan di partido RAIZ no ta respeta opinion di e pueblo y a demostra di ta para banda di e grupo minoritario y trapa riba democracia. Nos por mira cu accion 21 y partido RAIZ a brasa otro den e proyecto di ley aki.
Ta obvio cu e minister president di Aruba ta tuma decision y no ta respeta e deseo di nos pueblo. E pensamento di nos prome minister no ta pa sirbi bienestar di e pueblo di Aruba, pero pa cumpli cu e exigencianan impone pa e Sustainable Development Goals cu kier kita e libertad di pueblo pa scoge. Minister president ora e ta na Hulanda e papia un cos y na Aruba e ta bisa un otro cos.
Laga nos warda mira kico e minister president lo bay bisa despues di e disgusto grandi cu ta reina bao di pueblo di Aruba riba e tema di matrimonio di mesun sexo. Nos di partido Curpa no ta kere cu minister president lo bay bringa un cos cu e mes a firma pe pa locual cu e punto di Sustainable Development Goals. Nos tur sa cu e minister president nunca ta para pa e berdad.
Aruba ta para dilanti di un reto grandi y nos tin un gobierno cu conoce solamente biahamento y sin ningun resultado durante 6 aña di gobernacion. Puro malgastamento di placa di pueblo y suta pueblo cu medida. E luna aki so 4 minister ta biaha pa Europa.
E dianan nos dilanti lo ta dianan dificil, pero nos confiansa mester keda den Dios. Laga nos fundeshi ta traha riba e baranca cu yama Cristo. E ley di matrimonio di mesun sexo ta cla pa wordo presenta den Parlamento y ta sigur cu mayoria parlamentarionan lo vota na fabor.
Si e supuestamente parlamentarionan cristian tin e curashi nan lo distancia di nan partido y asina gobierno lo cay. Esaki lo haci cu dentro di 90 dia un eleccion lo mester wordo yama. Pueblo lo tin e oportunidad pa vota pa un partido cu ta contra di e ley aki.
Partido Curpa ta keda e unico alternativa.
