Diasabra e Seleccion Nacional masculino di futbol a enfrenta U.S. Virgin Islands den e competencia di Concacaf Nations League. E prome tempo a bay aden tabla na 0-0, pero den di dos tempo cos a bolter y Aruba a anota e prome gol. Wega a continua y na final seleccion di Aruba a sali victorioso, unda a gana cu e score di 3-1 y asina a bay cu otro tres punto.
Marvic Bermudez, coach di Seleccion Nacional di Aruba, a indica cu e wega no tabata facil pa motibo di e orario. Nan a palabra un tactica, unda cu e hungadonan mester a spaar energia ya cu nan mester a hunga 90 minuut. El a expresa cu no por yega hunga pa loco y gasta e energia desde trempan. E coach tabata di pensamento cu U.S. Virgin Islands tambe a tene cuenta cu esey.
Pa loke tabata e resultado, Bermudez a expresa cu nan tabata contento cu esey. E score di 3-1 ta un stap grandi p’e seleccion di Aruba. Awo nan tin seis punto y ta na prome luga den e grupo. P’e coach e wega aki tabata uno hopi emocional, pasobra despues di shete aña por a hunga bek na cas. Aki por a brinda pueblo di Aruba un partido, unda ta representa e bandera dignamente.
Un otro motibo pakico esaki ta algo emocional pa Bermudez, ta cu su 40 aña el a coach varios wega local como internacional. El a expresa como un ser humano, un adulto, cu su tata y su dos yiunan por tabata presente pa mir’e coach un wega. P’esey e tabata un wega emocional pa su persona. “Pakico mi ta duna e mensahe aki. Mi ta un meneer di scol y mi ta haya ta asina importante pa e mayornan apoya nan yiunan haci durante wega”, el a expresa. Esaki tabata prome bes cu su tata a mir’e ta coach un wega.
E seleccion di Aruba ta den Liga C Grupo B hunto cu Cayman Islands y U.S. Virgin Islands. Den e wega contra Cayman Islands, e hungado di Aruba Darryl Bäly, kende ta naci na Hulanda, a haya un carchi cora y esey a pone cu no por a conta cu ne e biaha aki. Bäly ta hunga den di dos division pa FC Lisse na Hulanda.
Aruba su siguiente compromiso ta dia 16 di november contra U.S. Virgin Islands un biaha mas. No ta conoci ainda unda e encuentro aki lo tuma luga.
