Diamars mainta a papia cu Marylaine Lopez di Cruz Cora. E ta lider di e team pa desaster na Cruz Cora Aruba. Lopez a splica cu for di ayeranochi caba a tene un reunion di emergencia den cual a dicidi pa activa e plan corespondiente pa e situacion aki di mal tempo.
Esey ta nifica cu tin cuater asina yama Emergency Response; cada un di 18 boluntario, ademas di Service Team. Ironicamente e fin di siman aki Cruz Cora tabatin un simulacro programa, pero awo ta prepara pa atende cu un situacion real.
Ya Cruz Cora a cuminsa prepara material y tin un aanhangwagen cu material aden pa cualkier eventualidad. Di e manera aki tin tur cos na man y ta cla pa sali. “Nos no ta pega soño, nos no ta drumi. Nos a bestel material y tin material nobo cu a yega y ta cla pa sali na cualkier momento,” asina Lopez a afirma. E ekipo ta uno hoben, pero bon prepara cu a ricibi tur entrenamento necesario. Si Cruz Cora tin mester di ayudo, lo bin afo pa bisa esey, pero prome ta busca den e organisacion mes.
Lopez ta premira cu lo tin hopi awa compaña cu biento. “Nos mester ta sincero y honesto; Aruba ta un tiki awa mester y ya nos ta encontra problema. Keda monitor e medionan, scucha informacion y prepara bo mes, prepara bo cas, prepara bo famia. Esey ta e prome tres stap cu mester haci.”
Cruz Cora ta dispone di un lista cu nan tin publica riba website y pagina di media social. Tambe hopi ta esunnan cu a bay personalmente na sede di Cruz Cora na Dakota pa busca e lista imprimi y asina cuminsa cu nan preparacion. Lopez a indica tambe cu riba nan pagina di Facebook tin un video di instruccion den diferente idioma.
A pasa brevemento door di e lista mencionando loke cada cas/persona mester. Na prome luga awe (minimo un galon pa tres dia), cuminda facil pa prepara, flashlight, radio, celular, powerbank y charger, caha di herment, placa cash (den caso cu coriente faya y no tin ATM/Mashin POS disponibel), paña extra/regenjas. Fuera di esey, mester controla dak, bentana, haci rond di cas limpi, percura cu mascota ta safe y paden.
Cruz Cora tambe ta pidi pa tur hende keda trankilo, ta pendiente di canalnan oficial y ta prepara. “Rode Kruiz ta cla, Rode Kruis ta prepara, Rode Kruis tin personal suficiente, tin material pa traha. Si algo pasa Rode Kruis lo habri su portanan y nos por duna e asistencia manera nos ta duna semper na e comunidad di Aruba,” asina Marylaine Lopez a finalisa bisando.