ALELUYA … no tin ningun situacion cu nos por ta den cu Cristo Hesus no por libra nos, pasobra locual ta imposibel pa hende ta posibel pa Dios.
Nunca nos por limita e poder di Dios, Ora e pueblo di Israel a kere cu no tin salida for di Egypto , Señor a habri Laman Corra .( Exodo Capitulo 2 vers 14+15 y Exodo Capitulo 14 vers 14 +15+16).
Den 2 Cronicas capitulo 7 vers 13 + 14+15 Dios ta duna instruccion con pa sali for di pestilencia y tur otro sorto di problema, pasobra E ta Dios y E so ta Todopoderoso. Nos mensahe no ta fanatismo pero ta e realidad di bida pasobra e ta para scirbi den e palabra di Dios .
Pero awendia hende a cohe ciencia y materialismo pone dilanti y a lubida riba Dios, tin hopi asunto cu hopi commission ta wordo forma, pero nunca bo ta tende a wordo forma un commission di oracion, pa asina activa bendicion di Dios den nos situacion, ta parce manera hende a haña berguensa di aserca Dios.
Pasobra miedo pa haci pica solamente ta existi serca esnan cu tin temor di Dios, pasobra nan ta corda riba e consequencia, cu hende no por gaña, ni tampoco haci bofon di Dios, tur locual hende sembra nan lo cosecha.
Awe nos tur ta para den un situacion cu nos mester di Dios, nos tin un enemigo invisible, cu ta mata hende, pa medio di ciencia hopi a wordo haci, pero spiritualmente Dios por haci mas ainda, pasobra e tin poder pa para e asunto maligno aki, si nos como pueblo bini su dilanti y deposita nos peticion cu confiansa y gradicimento y Dios lo scucha for di cielo y lo sana nos tera.( Isaias Capitulo 37 vers 14 te cu 20).
E pueblo no por reuni na gran cantidad den un lugar y sclama na Dios pasobra esey no ta permiti, pero si den cada cas, nos halsa nos bos na Dios, y sclama na Dios , E ta scucha nos y atende nos situacion.
E malesa ta contra union familiar, e ta contra economia, e ta contra tur locual ta bienestar di hende, pasobra e wordo traha pa domina hende, y tuma control riba hende, pero e no tin control riba nos oracion, cu ta subi na cielo, y eynan nos tin e ventaha, pasobra awor e clamor di e pueblo lo sali for di cada hogar, mescos cu tempo e pueblo di Israel tabata den Egypto.
Y nos lo continua te na momento cu Dios libra nos completamente for di e virus aki.Pa Dios nada ta imposibel, e ta Dios pa semper y semper, y pa awor aki tur hende mester a ripara cu nos tin mester di Dios, cu e cos aki ta obliga nos tur na cuida otro y cuida nos mes.
Nos ta haci un yamada pa cada hogar lanta un clamor na Dios y asina e bira un clamor nacional di obedencia na Dios, algo cu lo tembla e mundo di scuridad, ora den cada cas Alabansa y Oracion wordo halsa na Dios Todopoderso, pasobra Dios a primiti, y Dios ta cumpli. Pastor Marcel Balootje.
