Formado mr. Evelyn Wever-Croes ta den reunion cu diferente stakeholder y durante ora di atardi a reuni cu e Iglesianan Cristian di Aruba. E asociacion a haya oportunidad pa vocifera e cosnan cu ta biba entre e iglesianan cristian.
Pastoor Frank Daal a splica cu nan ta un constelacion di 41 iglesia y diferente denominacion. Aki nan a papia riba e cosnan cu nan ta haya importante p’e formado entre otro e asunto di pandemia, efecto di pandemia na Aruba y con nan ta trat’e. Tambe a splica riba e trainingnan cu nan ta haci y con el a yuda. Algun otro topico cu nan a atende cu ne tabata e debe nacional excesivo, violencia domestico y violencia di mucha.
Iglesianan Cristian di Aruba a papia riba educacion general, husticia den sociedad. Tur dia nan ta atende cu hende y e miembronan ta topa cu hopi cos. Algun di e cosnan aki a pone den un carta pa formado y esey ta pa tene cierto cos na cuenta. Aworaki na Aruba tin un aspecto di crisis social cu a bira mas pio cu e pandemia. Pa loke ta salud mental, esaki ta bira mas fuerte y a papia riba esaki unda a splica con e iglesianan cristian ta atende cu esey. Nan ta mira cu esaki ta un oportunidad cu hende ta bay bek na norma y balor puro, sano saca di palabra di Dios.
Tur esaki a pone nan para keto riba bida y cuminsa aprecia e cosnan importante manera comunion, tin otro dilanti otro y no ta hopi riba media social. Tambe pa midi si trahamento hopi compara cu puresa di matrimonio, di famia pa trece tur esaki den balans. Nan ta haya e necesidad di pidi y busca training di Billy Graham, unda a bin cu e Rapid Responce Team cu a yega cerca esunnan cu tabatin necesidad durante 9/11. A bin cu esaki y a cuminsa cu un proceso di training, unda a trece e trahadonan social, consehero di misa, hende cu tin pasion pa yuda otro.
