Dialuna 18 di mei Cosecha Oranjestad a habri su portanan bek despues di a cera pa 9 siman door di e situacion di Covid 19. Despues cu autoridad nacional a aproba cu galerianan di arte por habri bek pa publico, Cosecha a prepara su tienda di Oranjestad y su team pa por opera den e situacion actual di Covid 19 manteniendo nan mes na e guidelines necesario.
Pa por a habri e tienda di Oranjestad dia 18 di mei, e team di Cosecha a hasi trabou preparatorio. Meta ta sigura publico cu kier bishita e tienda cu Cosecha su personal y su bishitantenan por wanta nan mes na e normanan nobo di Covid 19. A tuma lugar un limpieza rigoroso na banda pafor y paden di e edificio monumental na Zoutmanstraat 1 unda e tienda ta situa. Na entrada di Cosecha Oranjestad lo encontra hand sanitize, plexi glas na e caha, stickers indicando con pa cana den tienda y flyers indicando kiko ta e reglanan pa mantene “social distancing” y hygiena necesario.
Cosecha ta e tienda cu ta bende Artesania y Arte Local cu Seyo Nacional di Artesania. Door di habri un di e tiendanan, Cosecha ta cla pa sigui brinda un espacio pa bende piesanan unico di nos artistanan y artesanonan. Durante cu Cosecha a sera, a brinda servicio na publico mas cu por y pesey mes Cosecha a introduci tambe su servicio di delivery. Den caso cu cliente ta interesa den un piesa riba nos website, pagina di Facebook of Instagram, por jama na 5878709 of manda un email na [email protected].
Mirando e situacion nobo di Covid 19 unda cu e mundo online a haya un rol mas prominente, Cosecha a cuminsa cu cierto adaptacionan caba pa por extende su servicionan. Cosecha a brinda par di workshops creativo online y lo sigui desaroya e servicio aki. Tambe al momento Cosecha su webshop ta den proceso di wordo actualisa pa asina por hasi e servicio di delivery mas eficiente. Cosecha lo mantene publico na altura di e desaroyonan aki via medionan di comunicacion.
Cosecha ta invita publico pa considera un piesa unico di Arte of Artesania Local y cu Seyo Nacional di Artesania y asina sigui yuda sostene nos artistanan y artesanonan local mas cu por. Pa mas informacion por tuma contacto cu Cosecha Oranjestad na telefoon 5878709. Tambe por bishita e Facebook page di Cosecha: www.facebook.com/Aruba-Cosecha.
