Corte den e Caso Sumario di Stichting Fundacion Lotto pa Deporte contra Gobierno di Aruba (Minister Dangui Oduber), a tuma un decision awe 7 di februari 2018 na fabor di e hunta di supervision. E Hues a condena Gobierno suspende ehecucion di e decision pa retira e miembronan di e Hunta di Directiva di FLPD, te ora cu Corte den “Bodemprocedure” tuma un decision final. Ta ordena Gobierno pa laga e directiva sigui haci su trabou durante e caso den Bodemprocedure, cu tur poder adkiri. A ordena Gobierno pa suspende e nombracionnan di dia 10 di januari 2018 pa miembronan nobo pa e Hunta di Supervision y tambe a condena Gobierno na paga e gastonan di e caso.
Dia 5 di januari 2018, Stichting Fundacion Lotto pa Deporte y Silvio Janga, Benvinda de Sousa, Antoniun Kamperveen, Flavio Faneyte y Elias Kock, acesora pa abogado mr. Peter Mohamed y mr. Frank Kunneman a entama un caso contra Gobierno di Aruba, den e caso aki Minister Dangui Oduber, representa pa abogado mr. Anthony Ruiz di Bufete Croes, Wever & Tchong. Dia 10 di januari 2018 a pidi Hues pa tuma un Ordemaatregel, cu el a haci tambe pa evita decisionnan mientras ta atendiendo e caso sumario.
Click AKI pa lesa sentencia den caso FLPD contra Gobierno
Corte durante tratamento di e caso y den su sentencia ta tene na cuenta cu Gobierno ta considera cu ki ora bin un cambio di asignatura politico, esta ki ora Gobierno cambia, cu ta “normal” cu ta cambia e directivanan di fundacionnan. E Hues a tene na cuenta cu Gobierno no a evalua nan cualidadnan sino nan color politico y a uza e argumento ey so pa kita nan for di nan posicion. Corte no ta di acuerdo cu e pensamento aki, specialmente pasobra e fundacion aki, FLPD, tin su mesun statutonan, ta para independiente y tin su propio reglanan pa tene na cuenta. Pues, ta nifica cu tumamento di decision y maneho den FLPD no necesariamente ta mesun cos cu ehecucion di maneho di Gobierno.
Corte ta corda FLPD cu nan tin 4 siman pa cuminsa e caso civil den Bodemprocedure. No a opta pa impone un “dwangsom” pa Gobierno pasobra Hues ta confia cu e Gobierno nobo aki ta respeta sentencianan di Corte.
