Gobierno di Aruba a anuncia awe Bierna Santo un otro aumento den casonan confirma di Coronavirus. Di 82 caso cu a raporta ayera merdia, awe e cantidad a subi te na 86 caso confirma. Te cu awo a test 1058 persona, di cual 972 tabata negativo, 86 ta positivo, 27 a recupera, tin 302 den cuarentena, pues na tur nos tin 59 caso activo riba Aruba awe, cu ta 3 menos compara cu ayera.
Di e cifranan presenta, por nota cu mas hende ta recuperando completamente di e virus aki. E cifra ey awor ta aumentando mas lihe y cu cantidadnan mas grandi cu esun di casonan confirma. Di 2 el a bay 14, el a yega 20 y awe a subi na 27. Por spera mas crecemento den e dianan nos dilanti debi cu mayoria pashent ta cura di e virus den dos pa tres siman di tempo, dependiendo con e curpa ta want’e.
Gobierno a anuncia cu desde awe mainta 6:00am ta cuminsa Shelter in Place mas estricto, incluyendo tur supermercado cera, pa evita movecion innecesario riba nos isla. A pidi tur hende pa keda cas riba diabierna, diadomingo y dialuna venidero.
