Eleccion aki, contrario eleccionnan, tin un flyer hunto cu carchinan di voto, pa cada adres. Glenn Thode, presidente di conseho Electoral a splica cu e carchi pa vota, cu hendenan ta ricibi, ley ta pone acerca cu bo por duna informacion tambe tocante di voto riba cantidad, etc. Den e caso aki a scoge pa manda un flyer pa informa e personanan cu ta bay haci uzo di nan derecho di voto, simplemente riba e normanan cu ta bay ta conta den e urna electoral, esta stembureau. Di modo cu e hendenan ta informa delanta, nan por repas’e, informa nan mes riba e proceso di voto. Un votador bon informa, ta un votador por haci bon uzo di su derecho di voto y ta pesey e informacion eynan tambe a sali.
Loke ta tene cuenta cun’e
Thode a sigui splica cu tin regla ora cu un votador yega un urna. Tambe ta asina cu e dia di voto lo bay den un forma cu tin un orden prescribi caba. Esaki ta den un leidraad den un urna electoral. Por repas’e hasta riba e website cu tin na www.censo.aw. Si bay eyriba, nan tin den e prome parti comunicado, riba e website, lo bay haya caba prescribi, tur e reglanan. E ta importante pa hendenan sa cu esaki ta cuestionnan cu ta prescribi, cu no ta simplemente ta gana di un di nan ta determina kico ta conta como norma den e urna electoral. Ta importante cu ta informa e hendenan con pa nan haci miho uzo posibel di nan voto, manera cu ta indica. E ta un derecho sagrado, fundamental, constitucional di nos hendenan, cu nan por eherce e derecho aki individual, nan mes personalmente. E derecho di voto ta un reto cu ta eherce priva. Den secrecia di abo como persona so. E normanan cu ta conta den un urna electoral ta pa haci efectivo e derechonan aki.
Den exterior
Si un hende no ta na Aruba riba e fecho eynan, esaki no ta posibel. E ley no ta duna apertura na esey. A haya berdad diferente peticion pa esaki. Tin algun pais den cual si e ta regla den ley cu bo por apodera un otro hende pa vota p’abo. Na Aruba, esaki ta un derecho personal cu bo no por translada pa un otro persona. Ta abo, como persona individual mester presenta, identifica bo mes na e urna electoral. Nan ta verifica bo identidad pa ta sigur cu ta abo mes tin e derecho di voto y ta abo personalmente so por eherce bo derecho di voto e dia ey.
Color
Thode a menciona cu esaki ta un proceso prescribi pa ley. En principio, partido cu a duna dia di entrega di lista nan preferencia di color, si tin un partido cu ta e so a duna preferencia di color, e color aki ta e color cu lo bay riba e lista. Ora cu traha e stembiljet y esnan cu tin mas cu un partido cu tin preferencia pa e mesun color, lo mester trek lot y lot ta determina e ora, ta na cua di e partidonan cu a duna e mesun preferencia, pa e color cu lo bay.
Reunion publico
Esaki lo tuma luga dia 30 di Augustus, caminda cu nan lo trek lot na Stadhuis den un reunion publico.
