Den un forma oficial conseho Electoral a caba di confirma a caba di mustra cual ta e lista di partidonan cu a haya e valides pa por participa den eleccion cu ta bin.
Glenn Thode, presidente di Conseho Electoral, a splica cu e reunion aki riba su mes ta un reunion cu no ta tuma hopi tempo mas, pasobra ya caba siman pasa a repasa tur e criterianan legal pa wak cua partido, cua lista en principio, ta cumpli cu e criterianan di un entrega valido. Awe meter a tuna decision encuanto e valides di e lista y e candidatonan riba e lista. Ley ta determina cierto tempo tambe riba cual si constata berdad cu tabata tin algo cu no ta cumpli completo cu e criteria cu tin espacio pa coregi esaki. Loke a mira ta cu a constata riba cada un di e listanan, excepto uno, cual tabata tin un pregunta riba dje, a constata algun cos cu mester a wordo coregi. A ricibi tur coreccion di tur e partidonan, a repasanan y por a mira cu tur e coreccionnan a pone cu tur criteria ta ser cumpli di e listanan cu a wordo declara valido. Tabata tin solamente uno cu por bisa tambe cu tabata un fayo cu no por coregi y esey tabata pa un lista. Tabata e lista cu ta e prome candidato ta sr. Elton Lioe A Tjam. E lista aki no tabata cumpli cu un criteria legal cu ta poni den articulo 25 di Kiesverordening bao di B, cu mester tin un cierto cantidad minimo di voto di sosten. Esaki no a cumpli cun’e den e tempo cu ley tambe ta perscribi. Ta e unico lista cu lamentablemente, pa e motibo ey, mester a declara invalido.
Notificacion pa AVP
Thode a splica cu esnan cu a entrega lista, cu a ricibi carta, ta sigui riba prescripcion di ley. Ley ta bisa cu ora constata cu tabata tin fayo den entrega, ta manda un carta, identificando e fayonan y determinando tambe e momento y e luga caminda cu por entrega coreccion riba e fayo. E lista cu sr. Eman riba dje no a constata ningun fayo y pa e motibo ey tambe no tabata tin necesidad di notifica nan cu tabata tin fayo manera ley ta perscribi. P’esey nan no a ricibi carta. E lista ey a drenta sin fayo y por a constata su valides.
Un a cay afo
Un lista so no a wordo valida, cual ta partido ABO. E rason tabata pa motibo cu ley ta perscribi cierto cantidad minimo di firma di sosten, di votado y esaki lamentablemente e lista eynan, no a haya e cantidad rekeri pa ley.
Siguiente reunion
E siguiente reunion ta dia 30 di Augustus, cual ta diaranson venidero. E ora ta 2’or di merdia, cual tambe ta publico. Rason pa tin e reunion eynan ta numeracion di e listanan, pa determina e secuencia di formulario di cual ta bay vota riba dje. Tambe pa determina e colo di e lista eynan.
