Un proyecto importante cu Arubaanse Voetbal Bond (AVB) tabata traha riba dje pa algun tempo caba ta e Academia di futbol di AVB. Dilanti diferente invitado, entre otro Minister di Deporte y Presidente di e comision fiho di deporte den Parlamento, tambe dilanti representantenan di FIFA y CONCACAF, a tene e apertura oficial di e academia. Tambe a entrega e representantenan di FIFA y CONCACAF y Gobierno e plan strategico cu AVB ta uzando pa desaroyo di futbol.
Tabata un momento hopi importante p’e federacion di futbol di Aruba, unda a dal un otro paso mas den e direccion pa por duna mas aporte y yuda desaroya futbol na Aruba. E ta un trayectoria, un proceso, cu a dura hopi largo, asina Ing. Richard Dijkhoff, Presidente di AVB, a expresa. E proceso di academia a inicia mas cu 10 aña pasa bou encargo di Presidente anterior Rufo Kelly. A yega e momento cu por bisa porfin a presenta e academia.
Academia di AVB ta parti di un plan integral y e federacion tin diferente plan hinca den otro, el a expresa. Ehecutando e plannan aki y cu e hendenan cu AVB tin, por garantisa cu lo mehora futbol. E ta un proceso cu lo tuma su tempo, no ta cos di implementa awe y mañan tin resultado. A dal e pasonan cu hendenan ta bisa cu AVB ta haciendo lo corecto cu sosten di FIFA y CONCACAF. Tambe cu e sosten di Gobierno y stakeholders cu ta participe den mundo di futbol. AVB a dal e pasonan pa por yega na e metanan poni y desaroya e hungado desde cu e cuminsa su carera den futbol te ora e termina. Ta dun’e oportunidad, dun’e ambiente sano caminda e por practica e deporte futbol.
Jason Roberts, Director di desaroyo di CONCACAF, tabata presente na apertura di Academia di AVB y den su perspectiva e dia tabata fantastico. E organisacion tabatin oportunidad di sinta cu Richard Dijkhoff y trata e plan tecnico y e plan strategico. Adicional di esey, AVB a bin cu proyecto di futbol pa identifica e talentonan. A topa cu hopi detaye, hopi pensamento strategico riba retonan y no solamente pa Aruba, pero tambe den e region di Caribe y CONCACAF, el a expresa.
“Mi ta pensa cu loke nos a mira aki ta e miho modulo practico y con nos ta haci esey. Tambe con pa colabora cu FIFA, CONCACAF of stakeholder local pa sigura di tin e miho programa p’e desafio cu tin na Aruba”, segun Jason Roberts. E plan strategico di AVB ta esun mas detaya cu Jason Roberts a mira desde cu el a join CONCACAF den e rol di Director di desaroyo.
Etienne Sillie, encarga cu desaroyo y educacion na CONCACAF, a felicita comunidad di Aruba y comunidad di futbol p’e momento historico door cu futbol ta un di e deportenan grandi di Aruba. Pa por sigui mantene e posicion di historia di Aruba, mester percura pa profesionalisa e parti di structura y educacion. Tambe brinda un ambiente di educacion p’e hobennan, el a expresa. E idea di plan strategico ta pensa riba termino largo. Pero di tin un plan di propio academia, ta reconoce talentonan, cu un forma specifico con ta train nan y con ta purba desaroya nan talento. Segun Etienne Sillie, cu e iniciativa aki a dicidi claramente pa haci esey di bin cu un academia den e organisacion pa desaroya e recurso humano unda cu Aruba tin hopi talento.
Na final a inaugura tambe e bus di Futbol, cu lo pasa den barionan pa busca e hungadonan y asina sigura cu nan ta atende training semanalmente. Tambe e bus lo sirbi pa transporta e futbolistanan pa e diferente stadionnan. Esaki tabata posibel danki na fondonan adicional cu tanto FIFA como CONCACAF ta pone disponibel pa Aruba, den cuadro di nos plan “Grow Football” cu e Presidente Richard Dijkhoff ta implementando awor cu gran exito y sosten di e partnernan internacional.
