Nelio Gomes da Silva, President Fundaςão Social Cultural Portuguesa, ta informa e comunidad Portugues y Aruba en general cu e aña’ki nan ta celebrando pa di 55 aña na Aruba Dia di Portugal, Dia di Luis Vas de Camoes y Dia di Comunidad Portugues.
E aña aki celebracion DIA DI PORTUGAL no ta e celebracion cu ta custumbra di tur aña nan, pero si e directiva kier a celebr’e di un manera diferente, mas bien den union familiar y pa por recorda e dia di awe 10 di juni Dia di Portugal, Dia di Luis Vas De Camoes y Dia di Comunidad Portugues rond mundo.
Na Aruba ta recordando e di 55 aña di existencia di e celebracion aki, na aña 1965 unda sr. Aventura Quimarais a tuma e iniciativa pa e tempo ey celebra dia di Portugal conhuntamente cu un grupo di Portugues na Aruba. Sr Aventura a nace na Portugal riba dia 9 di maart 1927 y cu su 36 aña el a emigra pa Aruba. Aventura su ofishi tabata welderdo, pero e no tabata un welderdo comun y coriente, e tabata un artista. E tabata miho conoci pa e homber cu tabata biba dilanti di Elmar N.V. riba Wilhelminastraat. E celebracion a inicia cu un marcha saliendo for di su cas riba Wilhelminastraat pa Wilhelmina Park.
E grupo di Portuguesnan aki den un forma hopi emocional a bini hunto p’asina gradici Aruba pa e bon aceptacion di e Portuguesnan na Aruba. Aventura Quimarais a fayece riba dia 17 di november 1993, pero te ainda riba e dia aki comunidad Portugues ta record’e.
Portuguesnan ta conoci di ta hendenan cu ta traha duro y lucha te na final. Nan a contribui na economia di Aruba den añanan 65, 70 y 80. Tambe nan tabata haci trabounan duro y pisa. Portuguesnan tabata busca un futuro pa nan famia y no ta importa e trabou. Pa nan tabata mas importante e dignidad pa tin un trabou y cu un dia nan lo logra.
Pa algun di nan, esaki tabata un cos no mucho bon pa haci, pero a sali fo’i nan pais pa traha y gana algo pa bay cas bek cu ne, y no pa keda semper. Esaki tabata e deseo di mayoria di nan. Pero na caminda cosnan a cambia. Asina a sosode cu Portuguesnan poco poco tambe a cuminsa integra den e sociedad di Aruba na unda nan a eherce diferente funcion den comunidad, educa nan famia y ainda nan ta aki y dera na e dushi isla aki Aruba.
Nan exito ta sin duda nan capacidad di adapta den diferente ambiente mientras cu na mesun tempo mantene bibo y practica e balornan di nan origen.
Y p’esey nan ta gradici ARUBA un biaha mas pa acepta Portuguesnan. “Danki na Gobierno di Aruba cu semper a forma parti di nos celebracion na Wilhelmina Park unda tabata ofrece nan gratitud y honra e comunidad Portugues.”
LUIS VAS DE CAMOES
Luis Vas de Camoes tabatin un bida turbulento, su aparencia inkieto no a permitie sigui traha na e corte di Dr. Juan Tercero, pero a ser manda guera na Morroco, eynan el a perde su wowo drechi. Despues el’a bay Portugal bek, pero na 1553 el a sali di aventura pa Oriente, durante su biahenan tabata skirbi su poemanan. Despues di 16 aña el a bolbe Portugal. El a yega pober y cansa, pero cerca di termina su obra pa e ofrece na su patria un obra cu un prijs impagabel ‘Os Lusíadas’. Añanan despues cu Portugal a cay den e dominio Spaño, e patriotismo di e poeta a sufri un golpi doloroso. El a fayece riba dia 10 di juni 1580, un poco dia prome cu el a muri el a skirbi:
“NA FIN BIDA LO CABA, TUR LO MIRA CU AMI TABATA AMIGO DI MI PATRIA Y CU LO MI PREFERA NO SOLAMENTE DI MURI NA MI PATRIA PERO CU MI PATRIA.” LUIS VAZ DE CAMOES
BANDERA PORTUGUES
• 5 Skina ta simbolisa e 5 rey Mouros cu D’Afonso Henriques a gana durante bataya di Ourique. E puntonan den e skina ta representa como e 5 heridanan di Cristo unda ta bisa durante bataya de Ourique Jesus Cristo crucifica aparece na D’Afonso Henriques y ta bisa nos ta bay gana e bataya. 7 Castilo ta simbolisa e localidadnan fortifica di Afonso Henriques. E berde ta simbolisa e speransa, e cora ta simbolisa e curashi y e sanger di e Portuguesnan durante bataya. Autor di e bandera di Portugal ta Columnao Bordalo Pinheiro, Joao Chagas y Abel Botelho na aña 1891.
Directiva di FSCP Club Primavera ta desea un feliz Dia di Portugal na tur e Portuguesnan residencia aki na Aruba, un dia cu nos ta recorda tambe e raisnan di nos identidad propio y tambe unda nos ta mustra di ta orguyoso di forma parti di e isla aki y ainda nos ta parti di e desaroyo di Aruba.
“Ao longo da nossa patria Portugal, O povo Português tem a coragem do sonho e a força da esperança. A História mostra-nos que não somos melhores nem piores do que os outros, Somos diferentes, somos Portugueses.
É essa singularidade que nos distingue dos outros povos do mundo.
É essa singularidade, esse modo único de ser Português, que celebramos no dia de hoje, o Dia de Portugal O dia de Luis vas de camoes y o dia das comunidades portugues pelo mundo. Viva Portugal!”
Directiva ta organizando diadomingo awor 14 di Juni 2020 bendemento di cuminda tipico Portugues pa recauda fondo pa cubri gastonan di e Club. For di 12or pa 3or di atardi na Club Primavera lo tin diferente cumindanan tradicional Portugues manera Bacalhau com natas, Frango ao Vinho y Espetada a Portguesa pa esnan interesa por contact miembro di directiva pa ticket Tel 5935299-5946460
Viva Portugal Viva Aruba ¡
