Marla Thiel Dominguez di Cruz Cora y Gregory Goedgedrag di Stichting The Heart of San Nicolas a ricibi for di man di comunidad Haitiano donacion den forma di mercancia pa esnan den mas necesidad.
Alix Geerman, bosero di e grupo di boluntario di comunidad Haitiano, den un conferencia di prensa a conta di nan proyecto.
E donacion aki ta den cuadra di e crisis di coronavirus, unda cu hopi hende a perde trabou y cu e necesidad basico ta hopi. A crea loke nan ta kere mester ta un pakete basico pa yuda dos fundacion, cualnan ta Cruz Cora y Stichting The Heart of San Nicolas.
“Pa nos e ta algo grandi, pasobra di e forma aki nos a cumpli cu nos parti pa yuda otronan cu ta necesidad,” Geerman a splica na e Consulado General di Haiti. A reparti 52 pakete en total.
Representante di ambos fundacion a sigura cu e comestiblenan ta bay den man di esnan cu mas necesidad. Cruz Cora so tin 20 mil aplicacion pa cuminda, y e ayudo cu nan ta duna ta via di cuminda cayente of voucher pa busca cuminda. Stichting The Heart of San Nicolas ta conoci cu e necesidad grandi di hendenan na San Nicolas. Tin biaha inhumano. Nan tin rond di 500 hende cu nan ta yuda.
