Condicionnan laboral na Boneiro ta miho cu na hopi parti di mundo. Esaki ta haci cu nan ta atrae docentenan for di diferente pais pa establece nan mes eynan.
Aruba den e ultimo tres añanan a perde diferente maestro / docentenan, kendenan a ricibi oferta atractivo pa haci e cambio for di Aruba pa Boneiro. Josephine Albertus, ex-presidente di Sindicato di Maestronan di Aruba (Simar) a muda cu su famia completo pa isla di Flamingo.
Den combersacion cu 24ora / TREMPAN, el a papia di su experiencia y e sistema di enseñansa na Boneiro.
Den diferente parti di Reino sa lesa cu Openbare Lichaam Bonaire (OLB) hunto cu Scholengemeenschap Bonaire (SGB) ta publica vacatura cu tin habri. Di e forma aki diferente Arubiano a bay establece nan mes na Boneiro, pasobra e condicionnan laboral ta hopi bon.
“Tempo cu mi tabata na Aruba, mi a haci un estudio pa haci un comparacion riba e condicionnan laboral na e diferente islanan di Reino. Lamentablemente ora cu nos a wak e resultado, Boneiro tabatin e miho condicionnan. Na Aruba e docentenan ta mas ora dilanti klas y ta haya menos pago.
Na Boneiro pa cada les cu e docente ta duna, ta haya pago. Cu mas motivacion ta bay traha, pasobra ta recompensa e docente pa loke e ta haci,” Albertus a conta.
Pa relato amplio, lesa TREMPAN.
