Comision pedagogico cu ta consisti di Departamento di Asuntonan Social, Centro pa Hoben y Famia, Fundacion pa Nos Muchanan, Stichting Wit Gele Kruis, Fundacion Respetami y Tienda di Educacion ta organisa un congreso pa pareha. Pa prome bes nan ta organisa e congreso aki yama Cende e Chispa di bo Relacion. E topico cu lo ta trata ta “Un relacion saludabel.”
Yvonne Bermudes, coordinador di Centro pa Hoben y Famia, a splica cu meta di e congreso aki ta pa stimula y ofrece herment, informacion, tip pa pareha. Tambe na tur esunnan cu no a den un relacion ainda por participa n’e congreso aki. Durante e congreso ta duna informacion con pa reconoce “si mi ta den un relacion sano.” Tambe lo duna informacion na esunnan cu ta den relacion y con nan por mantene of activa e candela di amor den e relacion.
E congreso ta tuma luga dia 3 di september den Renaissance Convention Center desde 9:00 am te 4:00 pm y ta completamente gratis. Pa participa mester registra prome y por tuma contacto na 6998900 pa manda whatsapp of por yama 5281200. Riba e dia aki ta bay tin tres orador y nan lo comparti diferente informacion pa tur esunnan cu kier sa mas con pa reconoce si bo ta den un relacion sano.
Enid de Kort, terapista di pareha y famia, a expresa di ta contento cu nan a uni forsa pa organisa e congreso aki. Pa hopi aña tin e idea aki riba mesa. Nan tin un preocupacion, pasobra na Aruba tin hopi pareha cu por bay miho cu otro. E cifranan di Departamento Social, di sesion famia, den e top tres di e casonan pa binti aña ta problema di pareha.
Un di e oradonan di e dia aki ta de Kort. E kier sa for di pueblo di Aruba si a yega di para keto riba con e welonan a comunica cu otro, con e welonan a comunica cu nan yiunan. Tambe con “nos mayornan a comunica cu otro.” E ta haya cu e preguntanan aki ta hopi importante, pasobra cu esey sin ta consciente por bay mustra con “anos” ta comunica cu pareha awo. De Kort ta bay enfoca riba esey durante e charla, cual tin e titulo di “E baile nobo den comunicacion.”
Dina Alexandra, intimacy & relationship coach, a indica cu hopi hende ta puntra kico tur loke e ta coach ta. El a indica cu e ta haya cu intimidad no tin educacion p’e. “Nos ta mat’e cu trabou di 9-5, cu stress”, el a expresa. Pafo ta lag’e muri, pero intimidad ta algo importante. Den un relacion y bo no sa con pa tin intimidad cu bo mes, e ora bo no por tin intimidad cu bo pareha.
Alexandra lo ta un di e tres oradornan durante e congreso y esey lo ta su tema. Riba e dia aki su persona lo duna un tiki di e chispa. Segun Alexandra, e no ta kere den divorcio, pero ta kere cu tin solucion pa tur cos. E ta haya cu hende mester educa su mes. Na Merca a haci un sondeo di cual na Aruba no ta haci esey, pero 20% di divorcio ta pasobra sexualmente no tin educacion.
Pa mas lesa TREMPAN.COM.
