Asociacion Welcome Plaza hunto cu algun comerciante di Welcome Plaza a presenta dilanti di Bestuurskantoor pa mustra nan malcontento. Nan malcontento tin di haber cu no ta haya hende pa papia riba nan situacion, pasobra ainda no tin solucion p’e baño, huur y hopi mas. Nan a presenta na Bestuurskantoor exigiendo pa haya oido for di esunnan encarga cu e situacion.
Lia Maldonado, miembro di directiva di Asociacion Welcome Plaza, a indica si tin un representante cu ta scucha nan y si por sinta hunto pa asina por yega ‘for once and for all’ na un areglo pa keda cla cu Welcome Plaza. Nan tin cuater aña y mey bezig y ainda nan ta den mesun situacion. A yega na un parti di cual a kere nan ta kedando cla, pero tur cos a cay na awa. P’esey durante dia mita di e comerciantenan di Welcome Plaza a bolbe presenta pa mustra nan malcontento.
Nan no ta hayando un persona pa scucha nan y asina yega na un solucion p’e problematica cu tin. Di parti infrastructura nan no ta hayando ningun hende p’asina por keda cla. Pa loke ta parti di financien si ta trahando cu tur hende ta hayando cobransa di henter 21 y 22 tambe. E malcontento ta cu nunca nan a keda cla cu e huur, no tin riba preto y blanco kico nan mester paga durante aña di pandemia, no tin areglo di e bañonan. El a expresa cu nada a cambia.
Elizabeth Guanipa, presidente di directiva di Asociacion Welcome Plaza, a indica cu nan no a cana e caminda di abogado pasobra den un estado di derecho, caminda tur cos mester cana manera ta stipula, unda tin un gobierno ta bisa hende ta central, un grupo di comerciante humilde no mester bay uno pa haya oido di e gobernantenan. Desde aña 2018 nan ta canando e caminda corecto, a manda carta pa tur hende, fo’i director di DIP, fo’i minister di finansas p’e asunto di cobransa di huur, minister di infrastructura. Nan a pasa den tres diferente minister di infrastructura y ningun por a yuda nan. E kier sa si esey ta e unico recurso cu hende tin awendia. Cu sino ta cu abogado no ta logra nada cu e gobierno?
E asociacion no kier yega na un abogado y p’e motibo ey a hacie di manera drechi. A haci peticion formalmente, varios biaha a presenta na prensa. Tabatin biaha cu DIP a reacciona riba nan, a sinta cu nan pero asina mes nunca ta mira resultado a bin afo.
Pa mas lesa TREMPAN.COM.
