E avion a sali cu destino Miami. Algun pasahero a avisa nos redaccion cu nan a caba di bolbe pasobra un pasahero a bira hopi malo. A resulta cu ta e pasahero Mayron Kock cu tabata biahando cu su casa pa Merca. Nan sa biaha frecuentemente pa Merca. E ta un comerciante di 36 aña biba na San Nicolas. E tin compania di tour cu quadracer y ta sali cu turista. Tambe recien a habri un negoshi di limpieza di pool. Ta un persona masha admira den San Nicolas cu ta gusta expone hopi cos riba red social. Den pasado el a traha steward riba un compania local di aviacion. Diahuebs si su careda a caba. No pasobra autoridad a pone man riba dje den un di su tantisimo biahe pa Merca, pero pasobra e transporte di droga a bay robes. El a guli bolita y un di nan lo a rementa of leak. Net e avion a lanta vuelo y tabata tumando rumbo pa Miami. Diripente el a cuminsa bira hopi malo y hasta a perde conocemento. A mira e stewardessnan na careda den avion coriendo riba abou. Na dado momento, segun algun testigo, el a medio reacciona y a admiti mesora cu e tin bolita den stoma.
E momento cu 24ora a bay live ainda no tabata sa cu e pashent baha tabata pa motibo di droga. Investigacion a cuminsa mesora y a mira basta movecion di Douane y polis di frontera moviendo riba abou. Dos Ambulance a presenta riba rampa. A hiba Mayron Kock cu urgencia pa hospital. Su situacion ta hopi critico. Poco biaha un persona cu guli bolita y esaki leak of rementa sa scapa. Cu esaki tambe ful e bon imagen di Mayron Kock a bay perdi. Kisas pa hopi tempo caba e ta transporta droga asina y e biaha aki e cos a bay robes. Ta menciona cu hasta den baño di e avion a keda basta sanger pero no por a confirma esaki. Tambe no ta conoci si a detene e casa y si e tambe tabata tin bolita den stoma. E avion despues di a baha a core un retraso di tres pa cuater ora. Probablemente lo pasa e cuenta aki tambe pa Mayron Kock. Awor si e scapa di e situacion cu e ta aden, e mester duna cuenta na husticia.
