Colegio Arubano ta celebrando su 60 aña di exsistencia; un rason sigur pa celebra y refleha. Colegio Arubano ta representa e base di hopi profesional den nos comunidad. Fuera di esaki, Colegio Arubano ta e cas di un hoben pa mas o menos 5 pa 6 aña. Aki na scol, e hoben ta siña conoce su mes, creciendo den un hoben adulto y ta crea su amistadnan pa bida. Cu e pensamento aki, y en conexion cu e celebracion di 60 aña a organisa un evento caritativo, cu e nomber: “The Reunion”.
E evento aki ta crea cu dos meta: pa prome, e ta primordialmente pa recauda fondo pa drecha facilidadnan di scol, cu ta den un fase cu ta rekiri solucion den un futuro cercano. Na di dos luga e ta pa rebiba momentonan special cu amistad- y ex coleganan, biniendo asina bek na e lugar di tanto recuerdo ,cual ta scol. En cuadro cu a projecto di The Reunion a crea um sistema di donacion pa asina compania nan por aporta na e causa. 1. Categoria Brons: ta consisti di un donacion di 1.000 florin. A cambio compania lo wordo menciona pa dia, 5 biaha riba Colegio Arubano su facebook page. 2. Donacion categoria Zilver: ta consisti di un donacion di 2.500 florin.
A cambio e compania por agrega su banner riba e website di Colegio Arubano pa un periodo di 1 luna. (3.400 bishitante riba e website, cual ta mayornan di studiante). 3. Donacion categoria Oro: ta un donacion di 5.000 florin pa e recaudacion di fondo den cuadro di celebracion di 60 aña di existencia, pa asina drecha e facilidadnan di scol. A cambio ta menciona e compania riba Colegio Arubano su facebook page 5 biaha, ta agrega un banner riba e website pa un periodo di 2 luna y e compania lo ricibi 2 ticket pa e fiesta di donacion “The Reunion”, dia 23 di november 2019. 4. Donacion categoria Platino: ta un donacion di 10.000 florin of mas, pa e recaudacion di fondo den cuadro di celebracion di 60 aña di exsistencia, pa asina drecha e facilidadnan di scol.
A cambio ta menciona e compania riba Colegio Arubano su facebook page 5 biaha, lo agrega un banner riba e website pa un periodo di 2 luna y e compania lo ricibi 4 ticket pa e fiesta di donacion “The Reunion” dia 23 di november 2019. Durante e fiesta di fundraising “The reunion” lo menciona e compania como un donador Platino.
E fondonan recauda lo bay completamente na scol, y en especial pa e prome fase, cual lo substitui e trailersnan.
“The Reunion” lo tuma lugar na Colegio Arubano mes, riba diasabra 23 di november di 7 or pa 12 or di anochi. E parti musical ta nan encargo di Robert Jeandor y su Solo Banda Show, Tsunami y diferente DJ cu lo hiba tur hende bek den tempo. E carchinan tin un costo di Afl. 60,00 pa persona. E ta sigur un prijs atractivo, cu lo inclui un welcome drink y entrada na e fiesta. Atrobe nos kier enfatisa, cu tur fondo recauda ta bay pa drechamento di e facilidadnan di scol. “The Reunion” ta conta cu bar y cushina bon surti y doorprizes atractivo. Tambe ta bay tin un programa di reconocemento pa 10 persona den comunidad e anochi aki. E idea ta pa demonstra con colegio a y ta forma un gran parti di cada persona su historia, su exito y mas cu claro pa inspira otronan. Bisando esaki, nos kier enfatisa cu tur ex Colegiano ta bonbini. E ta un evento pa diferente categoria di edad.
Nos kier haci un yamado na tur e ex Colegiano nan pa cera nan grupo pa asisti y aporta na e causa aki. E ta un bunitamomento pa recorda y duna bek.
Nos tin un special cu ta encera lo siguiente: cumprando 10 ticket, e prijs lo ta Afl. 500,00 y lo haci entrega di e ticketnan.
Ta tuma oportunidad pa menciona cu “The Reunion” no ta posibel sin ayudo di Romar Trading, Elite, e bandanan Tsunami y Robert Jeandor, DJ-nan como Nutzbeatz y Big Rick, MC Mark Benson, tur maestro, Directiva, Activiteitencommissie, OCCA y e voluntarionan cu ta haci e evento aki posibel.
Ta invita comunidad, companianan, ex Colegianonan pa haci un donacion prome cu aña cera, na un manera diferente. Pues recordando tempo di bo hubentud, bishitando bo scol y aportando na e bienestar di e scol, pa asina sigui crea lidernan den nos comunidad. Esaki ta manera e logo cu un studiante actual di Colegio Arubano a traha. Su motto ta bisa: Awe siña, mañan dirigi.
Tickets ta obtenibel desde e weekend aki na Colegio Arubano mes. Por acerca e docentenan pa mas informacion, como tambe Citgo Palm Beach, Citgo Boulevard, Paradera Gastation y Citgo Essoville.
Danki na tur esnan presente awe, como tambe tur compania cu a aporta caba desde algun luna atras den nos Sistema di Donacion y cu ta formando parti di “The Reunion”, cual lo tuma lugar den luna di november 2019.
Consulta nos facebook page @colegioarubano pa sigui e evento di “The Colegio Reunion” of por yama nos libremente na +2975822005, pa mas informacion di nos Sistema di Donacion y tickets pa “The Reunion”.
