Regularmente ta drenta melding na polis di supuesto “dropping” di droga na costa pariba di nos isla, patras di KIA mas o menos. Pero ora autoridad yega, no ta topa ni hende ni droga. Wel, awe campadonan a bin topa cu e tesoro perdi, dera bou santo blanco!
Tabata mas o menos 1:00 pm cu un campado, cobando den santo blanco pa por arma su tent pa campa e den e dianan aki di Semana Santa, a bin topa cu un tesoro cu bal hopi, pero cu por cost’e su libertad. El a opta pa haci lo corecto y a yama polis mesora!
Tabata alrededor di Grapefield cu esnan cobando pa pone nan tent a bin encontra pakinan di droga. No ta conoci kico tin sigur den nan pero segun testigo, a haci un “sneak peek” y cu e contenido ta parce cocaina.
Mesora polis di e unidad canino K9 hunto cu e unidad di recherchenan cu ta investiga crimen organisa a activa y a yega mesora na e sitio indica. Nan a confisca e pakinan pendiente di mas investigacion.
