Club di dam Arowak ta reanuda su actividadnan di dam pa aña 2021 diaranson awor dia 9 di juni pa 7:00 di anochi.
E prome actividad ta un simultaneo cu lo ta duna door di Rolin Croes.
Como custumber e ganado di e Campeonato di e aña anterior lo habri e actividadnan di dam cu un simultaan. Rolun a titula su mes como campeon di dam di Aruba pa aña 2020.
Un simultaan den wega di dam, ta unda 1 hungado (den e caso aki Rolin), ta hunga cu hopi hungado pareu, haciendo su zet na cada mesa. Tur hungado di dam por participa na e simultaan di dam aki.
Door di limitacion di espacio di nos club y reglanan di DVG, nos por acepta un maximo di 20 participante na e actividad aki. Tur participante mester registra nan nomber y cel ora di entrada den club y mester presenta cu nan tapaboca.
E simultaan ta cuminsa diaranson awor 9 di juni 2021 pa 7:00 di anochi.
Localidad lo ta den nan clubhuis na Nieuwstraat 11, Oranjestad situa den e edificio pariba di e plenchi unda e tram ta lora bay bek.
Ta invita henter pueblo hungado di dam pa bin midi forsa cu nos campeon di dam di aña pasa den un simultaan. Bo tin un bentaha riba dje door cu e mester parti su atencion entre tur e weganan cu ta hunga e anochi ey.
Na final lo check cuanto wega Rolin por a gana, cuanto el a tabla y cuanto el a perde.
Pa bo ta sigur di bo luga, bo por tuma contacto cu Mario Jansen (cel. 699-8245) of Ricardo Wever (592-6391) of Octavio Croes (594-5590) pa mas informacion y registra bo participacion.
Por pasa tambe sin registra entre 6:30 y 7:00pm riba diaranson dia di simultaan, pero tin un chens cu ya lo a cera 20 participante caba.
