Estefania Trejo ta un migrante cu a presenta un denuncia publico, caminda cu e ta keha cu nan no a lag’e drenta den DIMAS.
El a comenta cu su cita ta confirma den oranan di mainta (11:20 am). Pero riba e lista di security, e no tin su cita confirma y ta exigi un solucion pa su problema.
El a comenta cu no ta e so, sino tin varios persona cu a pasa den e mesun problema. E solucion cu DIMAS ta duna, ta pa busca un otro cita, cu ta te na fin di mei of comienso di juni.
Trejo a menciona cu e ta bay biaha dia 11 di april y e no por warda un cita mas pa otro dia. E tin mester un solucion pronto na DIMAS.
Ta yama e number di DIMAS, pero no tin contesta. Trejo ta cansa di yama henter dia y no tin contesta na telefon ni nada.
Security mester sigui un curso di recurso humano pasobra e no por expresa cu hende. Ta pidi fabor den bon manera y loke e ta haci ta rechasa nan totalmente, bisando cu e no sa di nada y no tin mas contesta.
Tur esaki, segun Trejo ta complica y cu e tin e mesun problema.
Hunto cu Trejo tabatin un dama na estado y tabatin e mesun problema.
E security a splica di su banda cu nan no a link via telefon y no a confirma. Contrario na esaki, Trejo a splica cu si e tine confirma y a print e confirmacion.
Trejo a indica cu e kier lucha pa tur esunnan cu a pasa den e situacion aki.
Un otro dama a splica cu esaki ta sosode tur dia. Loke ta pasa cu hende tin miedo di expresa, pasobra nan ta kere cu nan lo nenga nan permiso, lubidando cu tin libertad di expresion.
E ta kere cu tur esaki ta inhusto. Fuera di esey ta cobra boet pa un persona cu ya tin por lo menos ocho permiso.
E ta pensa cu e partido na mando mester baha pasobra nan no a soluciona nada pa e stranheronan.
